Azərbaycan güləşçiləri Xorvatiyanın paytaxtı Zaqrebdə keçirilən reytinq xarakterli turnirin son günündə 5 medal qazanıb.

Prosport.Az xəbər verir ki, son yarış günündə yunan-Roma güləşi üzrə millinin 11 üzvü xalçaya çıxıb.

Elmir Əliyev (55 kq)  finalda Mehdi Əhədi (İran) ilə qarşılaşıb və inamlı qələbəylə (7:0) fəxri kürsünün ən yüksək pilləsinə qalxıb. Qeyd edək ki, o, A qrupunda da bu rəqibini 6:3 məğlub etməklə yarışa başlamışdı.

60 kq-da ölkəmizi 3 güləşçi təmsil edib. Lakin nə dördqat dünya çempionumuz Eldəniz Əzizli, nə Nihat Məmmədli, nə də Hüseyn Qəribov medal qazana bilməyib. Sonuncu güləşçimiz bürünc medal uğrunda mübarizədə iranlı Puya Naserpura yenilib – 1:9.

Ülvü Qənizadə (72 kq) ilk mərhələdə çexiyalı Denis Mertli üstələsə (4:3) də, zədəyə görə yarışdan çəkilib. Onunla eyni çəkidə çıxış edən Ruslan Nurullayev bürünc medal qazanıb. İranlı olimpiya və dünya çempionu Məhəmmədrza Gərayi həlledici qarşılaşmaya çıxmadığı üçün Ruslan 3-cü yeri tutub.

Qurban Qurbanov (82 kq) bürünc medal qazanıb. O, rumıniyalı Vasile Koyoku vaxtından əvvəl (9:0) xalçadan məyus yola salaraq bürünc medalı boynundan asıb.

Arif Niftullayev (97 kq) hollandiyalı Tirone Sterkenburqu 3:2 hesabıyla üstələsə də, 1/8 finalda iranlı Şayan Habibzareyə uduzub – 0:8. Bu çəkidəki digər təmsilçimiz Murad Əhmədiyev 3-cülük üçün Habibzareylə güləşib və 6:3 hesablı qələbəylə bürünc medala sahib çıxıb.

Beka Kandelaki (130 kq) bürünc medal görüşündə rusiyalı Marat Kamparova yenilib – 2:3. Ən ağır çəkidəki digər milli üzvü Sərxan Məmmədov da bürünc medala yiyələnib. Sərxan macarıstanlı Koppani Laslonu “tuş”la üstələyərək fəxri kürsünün 3-cü pilləsinə yüksəlib.

Beləliklə, son yarış günündə güləşçilərimiz 1 qızıl və 4 bürünc medal qazanıblar.