AFFA U-10 Liqasının XI turunun "Azərbaycan Qartalları" – "Səbail" (4:5) oyununda hakim Ziyvər Əsədovanı söyən adam 1-ci komandanın türk futbolçularından birinin valideyni imiş.
Bu barədə Prosport.Az-ın redaksiyası ilə əlaqə saxlayan "Beşiktaş"ın Bakıdakı Akademiyasının koordinatoru Abdulkadir Öz deyib:
"Mən özüm həmin matçda olmamışam. Cəzalı idim (22 dekabrda keçirilmiş "Neftçi" PFK – "Azərbaycan Qartalları" oyununda hakimi təhqir etdiyinə görə qırmızı vərəqə ilə cəzalandırılmasına görə 5 oyunluq cəzası olub – red.). Həmin vaxt heç meydançanın kənarında da olmamışam. Həmin videoya baxmışam. Söyüş söyən valideynlərdən biridir. Təbii ki, qadın hakimə belə söyüş söymək yaraşmaz. Biz özümüz də bu məsələni araşdıracağıq və həmin valideynin oyunlara gəlməsini məhdudlaşdırmağa çalışacağıq".
Məsələ ilə bağlı "Səbail"in U-10 komandasının baş məşqçisi Sadiq Eyvazlının da fikirlərini öyrəndik: "Orda rəqib komandanın futbolçularının valideynləri və baş məşqçi (Anar Qasımovu nəzərdə tutur – red.) olub. Kadir müəllim orda olmayıb. Tərbiyəsizliyi edən valideynlər olub və məşqçi də onları sakitləşdirməli idi. Amma əksinə vəziyyəti qızışdırırdı".
Sonda onu da bildirək ki, əldə etdiyimiz məlumata görə, söyüşü söyən "Azərbaycan Qartalları" komandasının kapitanı və 10 nömrəli futbolçusu, həmin matçda het-trikə imza atmış Barbaros Tanrıverdinin valideyni olub.
14:00
AFFA U-10 Liqasının XI turunun "Azərbaycan Qartalları" – "Səbail" (4:5) oyununda insident yaşanıb.
Prosport.Az-ın xəbərinə görə, yanvarın 19-da Cüdo Federasiyasının Təlim-Məşq Mərkəzində keçirilmiş oyunda məğlub komandanın türkiyəli koordinatoru Abdulkadir Öz hakimlikdən narazı qalıb.
O, azərbaycanlı qadın hakim Ziyvər Əsədovanı idarə etdiyi görüşdə təhqirə yol verib. Öz "Səbail"in 4-cü qolundan sonra "Hakim görmür, oğlum. Onu unudun. Hakim eyni hakimdir. Ondan bir şey gözləməyin" deyib və daha sonra onu təhqir edib.
"Səbail"in qələbə – 5-ci qolundan sonra isə o "Sənə xına gətirəcəyəm, xına. Hər yerinə yaxarsan" deyib.
Qeyd edək ki, 43 yaşlı Abdulkadir Öz Azərbaycanda yaşayır. "Beşiktaş"ın yetirməsi olmuş Öz ilk dəfə 2005-ci ildə AZAL komandasına keçərkən, Azərbaycana gəlib. O daha sonra "Qəbələ", "Bakılı" və "Neftçala" komandalarında çıxış edib. 2011-ci ildə karyerasını "Neftçala"da başa vurub. Sabiq pleymeyker hazırda çempionatda "Azərbaycan Qartalları" adı ilə çıxış edən "Beşiktaş"ın Bakıda fəaliyyət göstərən Akademiyasının koordinatoru işləyir.
Xatırladaq ki, daha əvvəl AFFA U-13 Liqasında yararsız toplardan istifadə edildiyi bəlli olmuşdu.
