Azərbaycanlı MMA idmançısı Vüqar Kərəmov yenidən "Rizin" turnirində titul döyüşünə çıxacaq.

Prosport.Az-ın xəbərinə görə, 32 yaşlı idmançımızın rəqibi yapon əsilli braziliyalı Robertu de Souza olacaq.

Kərəmov noyabrın 17-də Yaponiyanın Naqoya şəhərində oktaqonda keçirilmiş döyüşdə Kazumasa Macimanı 28 saniyəyə nokauta salıb. Bununla da o, yüngül çəkidə (Lightweight) titul döyüşünə çıxmaq hüququ əldə edib.

Vüqar indiyədək 20 dəfə qalib gəlib, 5 dəfə uduzub. O, ötən il iyulun 30-da Saitama şəhərində yarımyüngül çəkidə (Featherweight) kəmər qazansa da, noyabrın 4-də həmin kəməri Bakıda Çihiro Suzukiyə (yeri gəlmişkən, o da bu turnirdə çempionluq titulunu müdafiə etmək üçün döyüşəcək – red.) uduzmuşdu.

"Satoşi" ləqəbli De Souza Braziliya Ciu-citsu üslubunda döyüşür və əvvəllər qraplinq idman növü ilə məşğul olub. 35 yaşlı idmançı indiyədək MMA-də 17 qələbə qazanıb və cəmi 3 dəfə məğlubiyyətlə barışıb.

Qeyd edək ki, de Souza artıq bir dəfə azərbaycanlı idmançı ilə kəmər döyüşünə çıxıb. Bu, 2021-ci ilin iyunun 13-də Vüqar Kərəmovun sabiq komanda yoldaşı Tofiq Musayevlə olub. Yaponiyanın paytaxtı Tokioda rinqdə keçirilmiş görüşdə braziliyalı döyüşçü 1-ci raundda idmançımızı boğma fəndi ilə təslim olmağa məcbur etmişdi. 

Həmin vaxtdan bəri Robertu de Souza 3 dəfə titulunu müdafiə etməyi bacarıb. Sonuncu dəfə o, braziliyalı həmyerlisi, "Killer" ləqəbli Luiz Qustavunu sentyabrın 29-da 21 saniyəyə məğlub edib.

O, 4-cü dəfə qazandığı kəməri müdafiə etmək üçün Vüqar Kərəmovla döyüşəcək. Bu döyüş dekabrın 31-də "Rizin 49" turniri çərçivəsində Yaponiyanın Saitama şəhərində baş tutacaq.