Ümumdünya Güləş Birliyi (UWW) tərəfindən Qraplinq, pankration və həvəskar MMA üzrə vahid Komitə yaradılıb. Belə ki, bu sahələrdə çox sayda idmançının bir neçə idman növü ilə məşğul olması səbəbindən bu idman növlərinin vahid komitə tərəfindən idarə edilməsi qərara alınıb. Birlik bu idman növlərini vahid komitədə birləşdirməklə bu sahəyə daha çox və peşəkar səviyyədə diqqət ayrılmasını hədəfləyir. Bununla bağlı milli federasiyalara müvafiq qaydada müraciət edilərək qraplinq, pankration və həvəskar MMA idman növlərinə dəstək verməyə çağırılıb.

Prosport.Az xəbər verir ki, İcraiyyə Komitəsi tərəfindən UWW-nin Büro üzvü, Azərbaycan Güləş Federasiyasının vitse-prezidenti Namiq Əliyev yeni Komitənin prezidenti, yunan əsilli Almaniya MMA Assosiasiyasının və Dünya Pankration Komitəsinin prezidenti Adrian Bakos isə vitse-prezidenti seçilib.

UWW-nin seçim qaydalarına uyğun olaraq milli federasiyalar tərəfindən əlavə 3 üzvün də seçilməsindən sonra komitə tam formalaşdırılacaq. Yeni komitəyə idmançı, məşqçilər və texniki komissiyalar kimi əlavə komissiyalar dəstək verəcək.

Pankration – həvəskar MMA bölməsinə UWW təmsilçiləri türkiyəli Onur Şimşək, Qraplinq bölməsinə isə isveçrəli Antonina Bosa nəzarət edəcək.

Qeyd edək ki, pankration əlbəyaxa döyüş idman növlərindən biri kimi Yunanıstanda yaradılıb və qədim dövrdə klassik Olimpiya Oyunlarının tərkibində yer alıb.

Qraplinq və MMA isə müasir idman növləridir. Güləş idman növlərindən biri olan qraplinqin özəlliyi boğucu fəndlərdən ibarətdir. Qarışıq idman növü olan MMA-da isə həm döyüş, həm də güləş fəndlərindən istifadə edilir. UWW həvəskar MMA üzrə yarışları peşəkar MMA-dan fərqli olaraq, qəfəsdə deyil, güləş xalçası üzərində keçirir.

Onu da bildirək ki, Azərbaycanda pankration, qraplinq və MMA Azad Əsgərovun rəhbəri olduğu Azərbaycan MMA və Qraplinq Federasiyasının kurasiyasındadır.