Karate üzrə beşqat dünya çempionumuz Rafael Ağayev "Karate Combat" təşkilatında qazandığı müvəqqəti kəməri qorumaq üçün ABŞ-a yola düşüb.

Məşhur idmançımız səfərə yollanmazdan öncə Prosport.Az-a açıqlama verib.

O bildirib ki, iyunun 24-də amerikalı Coş Kvayhaqenlə kəmər uğrunda keçiriləcək döyüş Mayamidə olacaq: "Son çempion odur. Mən hələ ki müvəqqəti çempion sayılıram. O, ötən dəfə zədəli olduğundan, mənimlə finalda başqa idmançı döyüşdü. Döyüş hərəsi 3 dəqiqə olmaqla 5 raunddan ibarət olacaq.

Mənimlə məşqlərimi birgə keçdiyim MMA idmançımız Tural Rəhimov da gedir. Həmçinin MMA məşqçisi Ruslan Əfəndiyev, onun tələbələri Tofiq Musayev, Mehman Məmmədov və Vüqar Kərəmov da Mayamidə hazırlıq keçdiyindən, döyüşümə baxmağa gələcəklər. Bakıda gündə 2 dəfə məşq keçmişəm. Təxminən 15 kq çəki salmışam. Hər şey qaydası üzrə gedib. Bu döyüşə başqa cür hazırlaşmışam. Məşqlərdə Turalla bərabər Vüqar Əsədov mənə kömək edib".

Rafael Ağayev Amerika qitəsində qadın karate millimizin üzvü İrina Zaretskaya ilə birgə keçirəcəyi seminardan da danışıb: "Döyüşdən sonra Bakıya qayıdacağam. İyulun 20-dən 30-dək Ekvadorda seminarda olacağam. Oradan Kosta Rika və Venesuelaya seminarlar üçün getməliyəm. Yalnız viza almaq qalıb".

Qeyd edək ki, Rafael Ağayev ötən ilin dekabrında amerikalı Reymond Danielsə qalib gələrək yarım-ağır çəkidə müvəqqəti çempionluq kəmərinə sahib çıxıb. Onun indiki rəqibi Coş Kvayhaqen isə əvvəllər 2016-cı ilədək MMA-da da çıxış edib. 36 yaşlı idmançı 14 görüşdən 9-da qalib gəlib. 

Həmçinin, həmin gün əvvəl orta çəkidə kəmər qazanmış Şahin Atamov fransalı Kenji Qrilonla qarşılaşacaq.

Səbuhi Musa