“Rəqib güclü komanda idi. Buna baxmayaraq, oyuna çox yaxşı hazırlaşmışdıq. Əsas problemlərdən biri ilk dəqiqələrdə ardıcıl 2 qol buraxmağımız oldu. Bu, matçın gedişatına da təsir göstərdi”.

Prosport.Az xəbər verir ki, bu sözləri 17 yaşadək futbolçulardan ibarət Azərbaycan milli komandasının (U-17) baş məşqçisi İlham Yadullayev Avropa çempionatının seçmə mərhələsinin 6-cı qrupunda Macarıstan yığmasına 0:4 hesabı ilə uduzduqları I tur matçı barədə deyib.

Mütəxəssis oyunu çevirməyə, hücumlarda çox iştirak etməyə çalışdıqlarını, ancaq həmin anlarda 3-cü qolu buraxdıqlarını bildirib: “2-ci hissədə üstünlük bizim tərəfimizdə idi, qol imkanları da yaradırdıq. Təəssüf ki, rəqib əks-hücumdan 4-cü qolu vurdu. Ümumilikdə uşaqlar yaxşı oyun nümayiş etdirməyə çalışdı. Macarıstanla görüşü yaddan çıxarıb, qarşıdakı 2 matça hazırlaşacağıq. Artıq bütün diqqətimizi Yunanıstanla oyuna yönəltmişik. Həmin qarşılaşmada uğurlu nəticə qazanmaq üçün əlimizdən gələni edəcəyik”.

Qeyd edək ki, U-17 millimizin Yunanıstanla oyunu noyabrın 16-da keçiriləcək.