Atası azərbaycanlı olan ABŞ sərbəst güləşçisi Vitali Orucov növbəti dəfə dünya çempionatında (DÇ) medal qazanıb.

Prosport.Az-ın xəbərinə görə, ABŞ-də Vito Arucau kimi tanınan idmançı bu dəfə Albaniyanın paytaxtı Tiranada keçirilən qeyri-olimpiya çəkiləri üzrə dünya çempionatının bürünc medalı ilə kifayətlənib.

25 yaşlı güləşçi 61 kq çəki dərəcəsinin bürünc medal görüşündə olimpiya və ikiqat dünya çempionu, Dağıstan kumıkı olan Zaur Uquyevə 8:3 qalib gəlib. Xatırladaq ki, Vitali Orucov ötən il Serbiyanın paytaxtı Belqradda keçirilən dünya çempionatında ilk dəfə qalib olmuşdu. Bununla da o, atası Vüqar Orucov kimi dünya çempionu olmağı bacarmışdı.

Qeyd edək ki, sərbəst güləş Azərbaycan idmançıları üçün uğursuz başa çatıb. Nurəddin Novruzov (61 kq) 3-cü yer uğrunda, Orxan Abasov (79 kq) və Əbubəkr Abakarov (92 kq) isə təsəlliverici görüşlərdə uduzaraq medal qazanmaq şanslarını itirib. Nəticədə Azərbaycan 18 xalla 9-cu olub. 1-ci yeri isə Gürcüstan və Yaponiya şərikli tutub. Hər iki komanda 55 xal toplayıb.