"Avropa çempionatında iştirak edəcəyəm".

Bunu Prosport.Az-a açıqlamasında yunan-Roma güləşi üzrə dördqat dünya və ikiqat Avropa çempionumuz Eldəniz Əzizli deyib.

O, Albaniyanın paytaxtı Tiranada keçirilən qeyri-olimpiya çəki dərəcələri üzrə dünya çempionatından sonra Ümumdünya Güləş Birliyinin (UWW) saytına müsahibə verib. 32 yaşlı idmançının açıqlamasında 2025-ci ilin aprelində Slovakiyanın paytaxtı Bratislavada keçiriləcək Avropa çempionatında iştirak etməyəcəyi göstərilib.

Lakin təcrübəli idmançı bununla bağlı fikirlərinin səhv tərcümə olunduğunu bildirib: "Mənə növbəti Avropa çempionatı barədə sual verilmişdi. Demişdim ki, növbəti il Avropa çempionatı mənim üçün o qədər də maraqlı deyil, əsas dünya çempionatı, 5-ci dünya çempionluğudur. Mən tərcüməçi vasitəsilə danışırdım. Onlar ya səhv başa düşüblər, ya da tərcüməçi səhv çatdırıb. Hələ bilinmir. Növbəti Avropa çempionatında da bəlkə özüm güləşdim".