Avropada ölkə çempionatlarının cari mövsüm üçün ən məhsuldar komandaları müəyyənləşib.

Prosport.Az xəbər verir ki, cədvəlin ilk “10-luğ”unda Azərbaycan təmsilçisi “Qarabağ” da var.

Misli Premyer Liqasına liderlik edən Ağdam klubu geridə qalan 9 matçda rəqib qapılarından ümumilikdə 25 top keçirib. Qurban Qurbanovun yetirmələri orta hesabla hər görüşdə 2,78 qolluq göstəriciyə nail olur ki, bunun sayəsində Donetsk “Şaxtyor”u (Ukrayna) ilə 9-10-cu yerləri bölüşdürür.

Reytinqə Portuqaliya “Sportinq”i başçılıq edir. Lissabon təmsilçisinin 8 turdakı orta məhsuldarlığı 3,38 qoldur. 2-ci pillədə 3,30 qolla İspaniya çempionatının lideri “Barselona” qərarlaşır. İlk “3-lüy”ü Niderland klubu PSV (3,22 qol) qapayır.

Azərbaycanın digər komandası “Sabah” isə bu baxımdan Avropada 50-ci sıradadır. Paytaxt təmsilçisi 10 matçda 20 dəfə fərqlənib ki, orta hesabla hər qarşılaşmaya 2 qol düşür.