UEFA Millətlər Liqasının Estoniya – Azərbaycan oyunundan öncə Fernandu Santuşun iştirakı ilə mətbuat konfransı keçirilib.
Prosport.Az-ın Estoniyanın paytaxtı Tallinə ezam olunmuş əməkdaşının verdiyi xəbərə görə, portuqaliyalı mütəxəssis azərbaycanlı və estoniyalı jurnalistlərin suallarını cavablandırıb.
– Bu gün ad gününüzdür. 70 yaşınız tamam olur, təbrik edirəm.
– Təşəkkür edirəm. Ümid edirəm ki, oyunçularım sabah mənə qələbə ilə hədiyyə verərlər.
– Bu qədər karyeranız var. Motivasiya verən səbəb nədir?
– Futbolu sevirəm. Bu idman növü üçün əlimdən gələni edirəm. Azərbaycanda çalışmaq mənim üçün böyük çağırışdır. Mənə motivasiya verən səbəb AFFA prezidentinin futbolla bağlı fikirləri idi. Azərbaycan xalqı da futbolu başa düşür. Bu ölkə gözəldir və burada çalışmaqdan məmnunam.
– Azərbaycan və Estoniya hər iki oyunda uduzub. Bu matçda qələbə sizə nə verəcək?
– Estoniyanın hər iki oyununa baxmışam. Slovakiyaya və İsveçə qarşı çox yaxşı oynadınız. Komandam bilir ki, hansı oyun fəlsəfəsinə üstünlük verirəm. Sabah da ən yaxşı oyunlarımızdan birini keçirməyə çalışacağıq. Hər iki komandanın oyuna motivasiyası fərqlidir.
– Əvvəlki 60 illik yubileyinizdə Portuqaliya millisi ilə Fransaya qarşı yoldaşlıq matçı keçirdiniz. Düzdür, 1:2 məğlub olsanız da, onda Kriştianu Ronaldu meydandan çıxmışdı deyə, penaltini Kuarejma vurmuşdu. Bu dəfə də ad gününüzdür. Penalti olsa, kim qolu vuracaq?
– Keçmişi mənə xatırlatdınız. Açığı, həmin matçı yaxşı xatırlamıram. Ancaq penalti olsa, bunu kim vuracaq, onu deyə bilmərəm.
– Estoniya ilə fiziki hazırlıq baxımından problem olmayacaq?
– Vacib olan mənim komandamdır. Rəqib haqda məlumata malikəm. Komandam da bundan məlumatlıdır və qələbə üçün əllərindən gələni edəcəklər.
– Emin Mahmudovun psixoloji durumu qaydasında deyil. Onunla psixoloji durumunu düzəltmək üçün söhbət edirsiniz?
– O, normal məşq keçir. Əhval-ruhiyyəsi yaxşıdır. Onun durumunda xüsusi bir şey hiss etmirəm. Adların mənim üçün önəmi yoxdur. Hamı komanda kimi döyüşməlidir.
– Emin Mahmudovun yoxluğunda kapitan kim olacaq?
– Mən sizin sualınıza hörmətlə yanaşıram. Bu sizin işinizdir. Ancaq bunu sabah biləcəksiniz.
– Sabahkı oyunda hansı taktikiya üstünlük verəcəksiniz?
– Taktiki düzülüş xüsusi əhəmiyyət kəsb etmir. Əsas onların mənim fəlsəfəmi düzgün başa düşməsidir.
– Estoniya ilə oyun Azərbaycanın əsl gücünü bilmək üçün kifayət edəcək?
– Bilmirəm. Deməzdim ki, Estoniya zəif komandadır. 5 metr məsafədən ofsayd pozuldu deyə ilk hissədə Slovkiyadan qol buraxdılar. Slovakiya ilə oyunun 2-ci hissəsində estonlar yaxşı oynadılar. Bilirəm ki, onlar hücum edən tərəf olacaq. Ancaq futbolçularıma tapşırmışam ki, geri çəkilməsinlər.
Səbuhi Musa