Futbol millimizdən sabah Estoniyanın paytaxtı Tallində qələbə gözlənilir. Bunu əksəriyyət söyləyir. Əks halda, yalnız ümid Bakıdakı oyuna qalacaq.
Ancaq pisini fikirləşmək belə istəmirik. Elə biz jurnalistlər də ümidliyik. AFFA və qanuni mərc oyunu "Misli"nin təşkilatçılığı səfərə yollanan jurnalistlərdən bəziləri "biz qalib gələcəyik" kimi optimist fikirlər bildirir.
Əslində bu, ilkin səfər təəssüratlarına giriş idi...
Dünən saat 15:00-də bizi komanda ilə birgə AZAL-ın çarter reysi birbaşa Tallinə aparacaqdı. Sonuncu dəfə milli ilə düz 10 il əvvəl – 2014-cü ilin oktyabrında İtaliya/Xorvatiya səfərində olmuşdum. Ona görə də bu 10 il ərzində millinin düşərgəsində yeni qaydalar, yeni tələbləri bilmək maraqlı idi.
Məlum oldu ki, baş məşqçi Fernandu Santuş jurnalistlərin futbolçularla təmas və ünsiyyətini istəmir. Lap yaxşı. Biz də öz jurnalist dairəmizdə təyyarənin bizim platformaya yaxınlaşmasını gözləməyə başladıq. Təxminən 15:20-də təyyarəmiz havaya qalxdı. Məlum oldu ki, Vaqif Sadıqov da bizimlə uçur.
Yox, yox, söhbət heç də milli ilə əvvəllər səfərlərə yollanan AFFA-nın sabiq vitse-prezidentindən getmir. Bizim təyyarəni sağ-salamat getdiyi ünvana çatdırmalı kapitanın ad-soyadı məhz bu cür idi.
5 saatlıq uçuş bizi gözləyirdi. Deyilənə görə, Ukraynadakı müharibə ilə əlaqədar Bakıdan Tallinə təyyarə nisbətən uzaq məsafədən uçurdu. Hər halda qapıçılar üzrə məşqçi Kamran Ağayev təxminən 1 saat bizi keçmiş söhbətlərə qaytararaq bu vaxtın yorucu olmasının qarşısını mümkün qədər ala bildi. Təbii ki, Kamran Ağayevdən indiki qapıçıların performansı haqda da soruşduq. Ancaq söhbətlərimiz yazmaq üçün yox, özümüzdə müəyyən təəssüratların yaranması üçün idi.
Gəlib, çatdıq Tallinin kiçik hava limanına. Pasport-kontrol öncəsi Mahir Emreli həmkarlara mətbuatda yazılan kimi komanda yoldaşı ilə dava etmədiyini bildirməyə çalışırdı. Məlum oldu ki, yazının mənbəsi olan "Bild"dəki tərcümədə də kiçik nöqsana yol verilib...
Daha sonra çamadanlarımızı yığıb 4 ulduzlu "Hestia Hotel Europa"ya tərəf yol aldıq. Əvvəlki illərdə olduğu kimi, komanda və jurnalistlər fərqli hotellərdə qalır. Komanda məşhur hotellər şəbəkəsi olan "Radisson"da qalır.
Əvvəldən də gözlədiyimiz kimi, Tallin bizi soyuq və yağmurlu hava ilə qarşıladı. Bu gün isə Fernandu Santuşun mətbuat konfransı və millinin açıq məşqi var. Artıq hava buludlu olsa da, güclü yağış gözlənilmir.
Səbuhi Musa
Bakı-Tallin