İngiltərənin 21 yaşadək millisi (U-21) Bristol şəhərində keçirdiyi oyunlarda qələbə qazana bilmir.

Prosport.Az-ın xəbərinə görə, ingilislər oktyabrın 15-də Bristolun 27 min tamaşaçı tutumu olan "Eşton Qeyt" stadionunda Samir Əliyevin çalışdırdığı U-21 millisini qəbul edəcək.

İngiltərə U-21-i 2007-ci ilin avqustunda bu stadionda Rumıniya ilə 1:1 oynayıb. Həmin matçda Mett Derbişayr hesabı açsa da, qapıçı Co Hart avtoqolla yadda qalmışdı. 2019-cu ilin martında isə ingilislər burada Polşanın müqavimətini qıra bilməyib – 1:1. Həmin görüşdə indi "Everton"da çıxış edən Dominik Kalvert-Lyuin fərqlənmişdi.

Yeri gəlmişkən, "Eşton Qeyt"dəki oyuna biletlər 5-16.25 funt arasındadır.

F qrupunda Ukraynadan 5 xal geridə qalan İngiltərənin heyəti açıqlanıb. U-21-də baş məşqçi vəzifəsini icra edən Bən Föçə Ukrayna və Azərbaycanla oyunlara bu 24 futbolçunu çağırıb.

Qapıçılar: Ceyms Bidl ("Şefild Venzdey"), Səm Tikl ("Viqan Atletik"), Ceyms Traford ("Bönli");

Müdafiəçilər: Çarli Kressvell ("Tuluza", Fransa), Kolum Doyl ("Norviç Siti"), Lyuis Holl, Tino Livramento (hər ikisi "Nyukasl Yunayted"), Teylor Harvud-Belis ("Sauthempton"), Cək Hinşelvud ("Brayton & Hov Albion"), Carell Kuansa ("Liverpul");

Yarımmüdafiəçilər: Eliot Anderson ("Notinqem Forest"), Arçi Qrey ("Totnem Hotspur"), Hayden Hakni ("Midlzbru"), Ceyms MakAti ("Mançester Siti"), Tayler Morton ("Liverpul"), Aleks Skott ("Bornmut"), Adam Varton ("Kristal Palas");

Hücumçular: Layəm Delap, Omari Hatçinson (hər ikisi "İpsviç Taun"), Ceymi Qitens ("Borusia" Dortmund, Almaniya), Səm İlinq-Cunior ("Bolonya", İtaliya), Ceydn Filoceni, Morqan Rocers (hər ikisi "Aston Vila"), Cey Stansfild ("Birminqem Siti").

Qeyd edək ki, oktyabrın 15-dəki matç Bakı vaxtı ilə saat 22:30-da başlayacaq.