Millimizin daha 2 legioneri UEFA Millətlər Liqasında Estoniya və Slovakiya ilə oyunlar öncəsi klublarında forma geyinib.

Prosport.Az xəbər verir ki, millimizin debütantı Zamiq Əliyev Albaniyanın "Eqnatiya" komandası ilə VIII tur çərçivəsində "Skenderbeu"nun qonağı olub. Son ölkə çempionu səfərdən 3 xalla ayrılmağı bacarıb – 1:0. Müdafiəçi olan 23 yaşlı futbolçumuz yenə 90 dəqiqə meydanda olub. O, ötən tur "Partizani" ilə qarşılaşmada olduğu kimi, yenə sarı vərəqə alıb. Bu dəfə o, 30-cu dəqiqədə cəzalandırılıb.

Hazırda "Eqnatiya" 14 xalla 2-ci pillədədir və lider "Partizani"dən cəmi 1 xal geri qalır.

Millimizin digər müdafiəçisi Anton Krivotsyukun çıxış etdiyi Cənubi Koreyanın "Tecon Hana Sitizen" komandası isə yarışı 11-ci pillədə başa vurub. Yığmamızın ukraynalı futbolçusunun komandası XXXIII turda səfərdə "Çecu Yunayted"lə qarşılaşıb və 1:2 hesabı ilə uduzub. Anton bu qarşılaşmada 90 dəqiqə meydanda olub. Hesabında 35 xal olan "Tecon Hana Sitizen" sonuncu pillədə qərarlaşan "İnçon"u 3 xal qabaqlayır.

Qeyd edək ki, reqlamentə əsasən komandalar 2 qrupda yarışacaq. 5 turdan ibarət mərhələdə ilk "6-lıq" yüksək yerlər, 2-ci "6-lıq" isə liqada qalmaq uğrunda mübarizə aparacaq.