Azərbaycanlı futbolçular – Mahir Emreli və Coşqun Diniyev millimizin düşərgəsinə yaxşı əhval-ruhiyyədə gələcək.

Prosport.Az xəbər verir ki, hücumçu Emrelinin çıxış etdiyi Almaniyanın "Nürnberq" komandası doğma meydanda "Proyssen"ə qalib gəlib. II Bundesliqanın VIII turu çərçivəsində keçirilən görüş meydan sahiblərinin 3:2 hesablı qələbəsi ilə bitib. Matça start heyətdə başlayan Emreli 72-ci dəqiqədə Lukas Şlayma ilə əvəzlənib.

Qeyd edək ki, "Nürnberq" 8 oyundan sonra 10 xalla 10-cu pillədə qərarlaşıb.

Dayaq yarımmüdafiəçisi Coşqun Diniyev isə "Bandırmaspor"la ötən mövsüm çıxış etdiyi "Ümraniyəspor"a qarşı oynayıb. "Bandırmaspor"un səfərdə turnir cədvəlinin 2-cisi olan "Ümraniyəspor"a qarşı görüşü 1:1 başa çatıb. Diniyev 69-cu dəqiqədə "Qarabağ"ın fransalı sabiq futbolçusu Adama Diakabi ilə əvəzlənib. Yeri gəlmişkən, "Ümraniyəspor"un yeganə qolunu 84-cü dəqiqədə U-17, U-19 və U-21 millimizin sabiq futbolçusu Barış Əkinciər vurub.

"Bandırmaspor" hazırda 8 oyundan sonra 12 xalla 8-cidir.