Bu gün Misli Premyer Liqasında IX turun daha iki oyunu keçiriləcək.

Prosport.Az xəbər verir ki, günün ilk matçında “Səbail” “ASCO Arena”da “Şamaxı”nı sınağa çəkəcək. Saat 17:00-da başlayacaq görüşü FIFA referisi Əliyar Ağayev idarə edəcək.

Hazırda Bakı klubu 4 xalla 8-ci, bölgə təmsilçisi 12 xalla 6-cı pillədə qərarlaşıb.

Günün son oyununda “Sabah” öz meydanında “Araz-Naxçıvan”ı sınağa çəkəcək. Saat 19:30-da start götürəcək matçın baş hakimi Cavid Cəlilov olacaq.

Səkkiz turdan sonra muxtar respublika təmsilçisi 16 xalla 2-ci, paytaxt klubu isə 14 xalla 5-cidir.

Qeyd edək ki, turun açılış matçında “Kəpəz” Tovuzda “Neftçi”yə 4:3 hesabı ilə qalib gəlib. Tura oktyabrın 6-da keçiriləcək 2 oyunla yekun vurulacaq.