"Kəpəz" Misli Premyer Liqasının IX turunda Tovuzda "Neftçi"ni 4:3 hesabı ilə məğlub edib.

Sportnet.az xəbər verir ki, Gəncə təmsilçisinin baş məşqçisi Azər Bağırov oyundan sonra keçirilən mətbuat konfransında jurnalistlərin suallarını cavablandırıb:

– Bu gün Gəncəyə olan raket hücumunun ildönümüdür. Qələbəni bütün Gəncəyə, şəhidlərə həsr edirik. Allah şəhidlərimizə rəhmət eləsin. Oyun barədə çox danışmaq mümkün deyil. Çox sevincliyik. Çoxdandır ki, qələbəyə həsrət idik. Bilirdik ki, doğru yoldayıq. Bu gün hər 2 hissədə istədikərimizi edə bildik. Əlimizə düşən fürsətlərdən maksimum yararlandıq.

– Hamı "Neftçi"nin qalib gələcəyini düşünürdü. Nəyi dəyişdiniz ki, bu gün komandanız qələbə qazandı?
– Bura gələndən 3 oyunda 3 məğlubiyyət almışdıq. Amma hər oyunda nələrisə daha yaxşı etməyə çalışırdıq. Bəzi şeyləri birdən-birə dəyişmək alınmır, addım-addım etmək lazımdır. İnanıram ki, bundan sonra daha yaxşı oyunlarımız olacaq. Hər şey inamdan asılıdır. Uşaqları inandıra bildik. Məncə, pis alınmadı.

– Qarşıda milli fasilə, daha sonra isə "Qarabağ"la oyun var. Özünüzü necə hiss edirsiniz?
– Çox gözəl hiss edirik. Fasilə bizim xeyrimizə olacaq. Bəzi məqamları yaxşılaşdırmağa çalışacağıq. "Qarabağ"a qarşı oynamaq xoşdur. Uşaqları həmin matça yaxşı kökləmək lazımdır. 

– Oyun planınız nə idi? "Neftçi"nin hansı üstün cəhətlərini təhlil etmişdiniz?
– "Neftçi"nin ən üstün cəhətləri cinahları və mərkəzi idi. Hamı istəyər ki, heyətində Filip Ozobiç kimi "10 nömrə" olsun. İlk tapşırığımız bu oldu ki, bizim vingerlər cinahdan çox çıxmasın və öz cinahlarındakı rəqiblərini zərərsizləşdirsin. Viktor Braqananın bir az problemi var, ingiliscə yaxşı bilmir. Amma oyundan-oyuna yaxşı olacaq.

– Yeni transferiniz Mahamadu Banı start heyətdə meydana buraxdınız. Oynamağa hazır idi?
– Mənim üçün futbolçunun yeni qoşulması önəmli deyil. Əsas onun beynində hazır olmasıdır. Fubolçu özü bildirdi ki, 70-80% hazırdır. Bu mənə bəs etdi. Məncə, pis təsir bağışlamadı.