"Gənclər Liqasının "Sabah" – "Qarabağ" oyununu tribunadan izləyirdim. Həmin oyunda futbola aid heç nə yox idi". 

Bunu Prosport.Az-a "Qarabağ" Akademiyasının koordinatoru Aftandil Hacıyev deyib.

O, U-19 Liqasının "Sabah" – "Qarabağ" (3:1) matçında baş hakim Niyaz Əhmədovun idarəçiliyindən narazılıq bildirib: "Əvvəldən olmayan penalti verməklə, qırmızı vərəqə verməklə oyunun ipini əldən verdi. Rəqib tərəfdən də meydana girən məşqçilər olurdu, amma onlara vərəqə göstərilmirdi. Meydanda birtərəfli hakimlik gördüm. Ona görə də çox oyun haqda danışmaq istəmirəm. Çünki görmək istəmədiyim mənzərə idi. Burada kimin qalib gəlib, kimin uduzmağı önəmli deyil. Sadəcə, bu, futbolçuların inkişafı üçün fayda verən oyun deyildi. Qərarların 90%-i səhv idi. Hakim oyunun yükünü qaldıra bilmədi".

Aftandil Hacıyev 90+3-cü dəqiqədə oğlu, "Qarabağ"ın fiziki hazırlıq üzrə məşqçisi Səid Hacıyev və köməkçi məşqçi Məhəmməd Bədəlbəylinin 2 oyunluq cəzalandırılması haqda isə bunları bildirib: "Düzdür, biz məşqçilərə fikirlərimizi bildirmişik. Nə olursa-olsun, meydançaya çıxmamalı və özlərini cilovlamağı bacarmalıdırlar. Amma dediyim kimi, onları bu dərəcəyə də gətirməyə ehtiyac yox idi. Nəticə ədalətli şəkildə olsa, hamıya xoş olar".

Qeyd edək ki, bu oyunda 2 penalti verilib, 3 qırmızı vərəqə və 10 sarı vərəqə göstərilib.