"Bu gün bizi çox çətin oyun gözləyir. Buradan 3 xalla qayıtmaq istəyirik. Komandama inanıram”.

Prosport.Az xəbər verir ki, bu sözləri Azərtac-a eksklüziv açıqlamasında İsveçin "Malmö" klubunun prezidenti Andeş Polson UEFA Avropa Liqasının əsas mərhələsinin II turunda bu gün Bakıda "Qarabağ"a qarşı keçirəcəkləri oyun barədə danışarkən deyib.

O, Azərbaycan təmsilçisinin güclü komanda olduğunu bildirib: "Rəqibimiz ilk turda "Tottenhem"ə qarşı səfər matçında yaxşı mübarizə apardı. Qol fürsətləri çox olsa da, dəyərləndirə bilmədilər. Sadəcə, həmin gün bəxt "Qarabağ"ın yanında deyildi".

Funksioner Ağdam klubunu texnikalı komanda adlandırıb: "Qarabağ" komanda şəklində müxtəlif komponentlərdə yaxşı təsir bağışlayır. Sürətli oyunçuları var və bunun sayəsində hücumlara daha tez çıxırlar. Həmçinin böyük avrokubok təcrübəsinə sahibdirlər. Həqiqətən də “Qarabağ” çox səviyyəli komandadır”.

Anders Palsson komandasının Avropa Liqasındakı şanslarını da dəyərləndirib: "Fikrimcə, hər oyunda qalib gələ bilərik. Çünki komandanın Çempionlar Liqası, eləcə də Avropa Liqasında böyük təcrübəsi var. Bu gün də "Qarabağ"la oyunda ən yaxşı nəticə üçün çalışacağıq".

Qeyd edək ki, Tofiq Bəhramov adına Respublika Stadionunda keçiriləcək “Qarabağ” – “Malmö” oyunu bu gün saat 20:45-də start götürəcək.