"Azərbaycan Futbol Hakimləri" İctimai Birliyinin ənənəvi olaraq, hər il keçirilən ümumi yığıncağı baş tutub.

Prosport.Az xəbər verir ki, görüşdə birliyin üzvləri olan veteran və aktiv hakimlər iştirak edib. 

İclası giriş sözü ilə açan Birliyin sədri Gülağa Cabarov iştirakçıları salamlayıb və cari ildəki fəaliyyət barədə məlumat verib. Birlik tərəfindən keçirilən görüşlər və seminarlar haqqında danışıb. 

Gülağa Cabarov futbol hakimliyimizdə olan müsbət məqamları qeyd edib və ədalət təmsilçilərinin beynəlxalq arenada daha çox təyinat almalarını xüsusi vurğulayıb. 

Daha sonra birliyin üzvləri növbəti dövr üçün fəaliyyət planı üzərində fikir mübadiləsi aparıb. İştirakçıların fikirlərinə əsasən, birlik tərəfindən hakimliyin təbliği üçün tədbirlərin artırılması, əlamətdar hadisələrin qeyd edilməsi və azarkeşlər arasında futbol oyun qaydaları ilə bağlı maarifləndirmənin aparılmasına ehtiyac var.

Sonda birliyə yeni şəxslərin üzvlüyü təsdiq olunub. 

Qeyd edək ki, “Azərbaycan Futbol Hakimləri” İctimai Birliyi 2003-cü ildən fəaliyyət göstərir və AFFA-nın üzv təşkilatıdır. Təşkilatın məqsədi futbol hakimliyinin və futbol oyun qaydalarının bütün üsul və vasitələrlə təbliği və inkişafına kömək etməkdən ibarətdir.