AFFA Gənclər Liqasının (U-19) "Sabah" – "Qarabağ" matçı insidentlə başa çatıb.

Prosport.Az-ın xəbərinə görə, prinsipial rəqiblərin görüşündə "Sabah" 3:1 qalib gəlib. 

"ASK Arena"da baş tutan görüşün ilk hissəsində baş hakim Niyaz Əhmədov əvvəlcə "Qarabağ"ı azlıqda qoyub. 20-ci dəqiqədə Səbuhi Niftiyev 2-ci sarı vərəqə ilə meydandan qovulub. Fasilədən sonra isə qapılara 4 qol vurulub. "Sabah"dan qolları Anar Hüseynov (55), Stefen Ende (72), Niyazi Osmanov (90+3) və "Qarabağ"dan isə Davud Mənsumov (60-cı dəqiqə, penalti) vurub.

Son dəqiqədə "Sabah"ın vurduğu 3-cü qolla "Qarabağ" tərəfi razılaşmayıb və oyundankənar vəziyyət olduğunu iddia edib. Baş məşqçi Vüqar Əsgərlinin köməkçisi Məhəmməd Bədəlbəyli və fiziki hazırlıq üzrə məşqçi Səid Hacıyev ("Qarabağ" Akademiyasının koordinatoru Aftandil Hacıyevin oğlu – red.) sərt etiraz edincə, onlara birbaşa qırmızı vərəqə göstərilib.

Oyundan sonra isə "Sabah"ın inzibatçısı Aslanla (soyadını dəqiqləşdirə bilmədik – red.) "Qarabağ"ın müdafiəçisi Səbuhi Niftiyev arasında mübahisə düşüb. Bu mübahisəyə Məhəmməd Bədəlbəyli də qoşulunca qalmaqal böyüyüb. "Sabah"ın məşqçisi Saşa Yunisoğlu isə tərəfləri ayırmağa çalışıb.