"Oyundan-oyuna nələrisə daha yaxşı edirik. Amma yenə də konsentrasiyanı itiririk. İlk hissədə daha yaxşı mübarizə apardıq. Hər iki yarıda bağışlanmayacaq səhvlər etdik. "Zirə"ni təbrik edirəm".

Prosport.Az xəbər verir ki, bu sözləri “Kəpəz”in baş məşqçisi Azər Bağırov Misli Premyer Liqasının VIII turunun “Zirə” ilə oyunundan sonra mətbuat konfransında deyib.

O, jurnalistlərin suallarını da cavablandırıb:

- "Qara zolaq"dan çıxmaq üçün hansısa planlar cızırsınız?

- Əlbəttə ki, cızırıq. Bu gün Paçunun gəlməsi, Pananın bizə qoşulmasını görürük. Oyun planında da bəzi dəyişikliklər var. Onları rotasiya edib yoxlayırıq. Düşünürəm ki, əsasən də müdafiədə daha çox dəqiqlik olmalıdır. Mən gələndən üç oyun keçirmişik. "Araz-Naxçıvan"la qola qədər pis mübarizə aparmadıq. "Zirə" ilə görüşdə də qola qədər pis deyildik. Futbolçular anlayırlar ki, nə etmək lazımdır. Bunu 90 dəqiqəlik çərçivəyə salmaq lazımdır.

- Yeni oyunçular olacaq?

- Qışa qədər transferlərimiz tamamlanıb. Amma hər şeyi zaman göstərəcək. Bir oyunçu da dünən bizə qoşuldu.