"Qarabağ"ın UEFA Avropa Liqasında daha 5 rəqibi oyuna çıxıb.

Prosport.Az xəbər verir ki, bunlardan 2-si uduzub, 3-ü qalib gəlib.

"Qarabağ"ın növbəti ay evdə qəbul edəcəyi "Malmö" (İsveç) öz meydanında "Reyncers"ə (Şotlandiya) 0:2 uduzub. 1-ci dəqiqədə qapısında top görən İsveç klubu rəqib çərçivəsinə yol tapa bilməyib.

Ağdam təmsilçisinin digər rəqibi "Ayaks" (Niderland) isə yeni formatda keçirilən turnirin ən böyükhesablı qələbəsini "Beşiktaş" (Türkiyə) üzərində qazanıb – 4:0. Qolları Kian Fits-Yim (31), belçikalı Mika Qodts (51, 73) və Kenet Teylor (55) vurub. Amsterdam təmsilçisi oyun ərzində İstanbul klubuna çərçivəyə dəqiq zərbə vurmasına imkan verməyib.

Rəqiblərdən FKSB (Rumıniya) isə RFS (Latviya) üzərində böyük hesablı qələbə qazanmaqda çətinlik çəkməyib – 4:1. Qolları Daniel Bırlica (8), Marius Ştefanesku (32), Darius Olaru (58, 69) Riqa komandasının qapısından keçirib.

"Qarabağ"ın 2 rəqibi isə Lion şəhərində üz-üzə gəlib. "Lion" (Fransa) "Olimpiakos"u (Yunanıstan) qəbul edib – 2:0. Rayan Şerki (65) və əlcəzairli Səid Benrahma (71) qolları vurub.

Qeyd edək ki, bir gün əvvəl "Qarabağ"ın rəqiblərindən "Elfsborq" (İsveç) səfərdə "AZ Alkmar"a (Niderland) 2:3 uduzmuş, "Budö/Qlimt" (Norveç) isə evdə güclü "Portu"nu (Portuqaliya) 3:2 məğlub etmişdi.