“Qarabağ”la oyun öncəsi komandada yeni zədəli futbolçu yoxdur”.

Prosport.Az xəbər verir ki, bu sözləri “Tottenhem”in baş məşqçisi Anqe Postekoğlu UEFA Avropa Liqasının əsas mərhələsində İngiltərədə “Qarabağ”a qarşı keçirəcəkləri ilk tur oyunundan öncə təşkil olunan mətbuat konfransında deyib.

Yunan əsilli avstraliyalı mütəxəssis London klubunun heyətində 5 futbolçunun Azərbaycan çempionu ilə matçı buraxacağını bildirib: “Hücumçular Rişarlison və Vilson Odober sıradan çıxıb, Kristian Romero cəzalıdır. Ced Spens və Serxio Reqilonun meydana çıxmasına isə həkimlər icazə vermir. Heyətdəki itkilərə baxmayaraq, komanda son oyunda və məşqlərdə yaxşı təsir bağışladı. Bu mənada ciddi problem olacağını düşünmürəm”.

O, "Qarabağ" haqda isə bunları deyib: “Qarşımızda təcrübəli Avropa komandası var. Avrokubokda təcrübə həqiqətən önəmlidir. “Qarabağ” istər Çempionlar Liqası, istərsə də Avropa Liqasında öz izini qoyub. "Qarabağ"ın son oyunlarını izləmişik. Onların çox güclü komanda olduğunu gördük, yerli çempionatda dominantlıq edirlər. Avrokuboklarda da bir o qədər uğurlu təsir bağışlayırlar. Bunu ötən mövsüm Avropa Liqasında sərgilədikləri oyun və qazandıqları nəticələrlə də sübut ediblər".

Qeyd edək ki, sentyabrın 26-da “Tottenhem Hotspur” stadionunda keçiriləcək qarşılaşma Bakı vaxtı ilə saat 23:00-da başlayacaq.