AFFA Hakimlər Komitəsinin sədri Frank De Blekere Azərbaycan Premyer Liqasının VII turunun "Turan Tovuz" – "Araz-Naxçıvan" matçındakı mübahisəli epizodu şərh edib.

Prosport.Az xəbər verir ki, o, Naxçıvan təmsilçisinin hücumçusu Ramon Maşadunun 13-cü dəqiqədə topa oynamaq istədiyini bildirib:

"O, ayağının ucu ilə “Turan Tovuz” komandasının oyunçusu Roderik Milerin baş nahiyəsinə zərbə endirir. Hakim oyunçunun düşüncəsiz davranışına görə ona sarı vərəqə göstərir. Təlimatlara əsasən, “Araz-Naxçıvan”ın oyunçusunun topa baxdığını və topa oynamaq istədiyini nəzərə alaraq, verilən sarı vərəqəni dəstəkləyirik. O, ayağının ucu (butsun altı ilə deyil) ilə müdafiəçinin başına/üzünə aşağı intensivliklə və o qədər də güclü olmayan zərbə endirir. Təhlükəli vəziyyət olsa da, “Araz-Naxçıvan”ın oyunçusunun etdiyi qəsdən təmas/qayda pozuntusu deyil".

Qeyd edək ki, görüş "Araz-Naxçıvan"ın qələbəsi ilə bitib – 2:1. Bu, Tovuz təmsilçisinin cari mövsüm ilk məğlubiyyəti olub.