"Biz bura xal götürməyə gəlmişdik. Buna görə oyunçularımı təbrik edirəm. Futbolçularım yaxşı oynadı. Amma mükəmməl oynadığımızı deyə bilmərəm. Çünki yenə qapımızda 2 qol gördük. Buna görə də məmnun deyiləm. Hücum xəttinin oyununa görə razıyam. Bilirik ki, bizim üçün burada çətin olacaq. Sonuncu qələbəmizi 2 il öncə əldə etmişdik. "Səbail" yaxşı oynadı. Amma biz daha yaxşı idik".

Prosport.Az xəbər verir ki, bu sözləri “Sabah”ın baş məşqçisi Krunoslav Renduliç Misli Premyer Liqasının VII turunun “Səbail”lə görüşündən (4:2) sonra keçirilmiş mətbuat konfransında deyib. O, jurnalistlərin suallarını da cavablandırıb.

– Böyük üstünlüyünüz var idi. Niyə oyun birdən-birə bu qədər çətin oldu?
– Müdafiədə səbirli oynamalıyıq. Hər vəziyyətə 100 faiz yanaşmaq lazımdır. Bu sadəcə keyfiyyətdən asılı olan məsələ deyil. Hər vəziyyətə yuxarıdan aşağı baxmaq lazım deyil, daha diqqətli oynamaq lazımdır. Bunu oyundan qabaq da demişdim. Müdafiədə daha məsuliyyətli olmalıyıq.

– İlk hissədə qolunuz ləğv olunanda Şahin Diniyev sizin ehtiyat skamyaya yaxınlaşdı. Sizə nə dedi?
– Xüsusi bir şey demədi. Sadəcə dedi ki, orada foul var idi.

– Oyunlar zamanı çox sarı və qırmızı vərəqələrlə cəzalandırılırsınız. Bunu normal hesab edirsiniz?
– Bu, normal deyil. Amma futbolda bəzən belə hallar baş verir. Hansısa epizoda çatmırsan, foul alırsan. Oyunun başlanğıcında bəzi sarı vərəqələri qəbul edərəm. Amma hakimə şikayət edib, vərəqə almağı qəbul etmirəm.

– Bu gün matç heç-heçə bitsəydi, uğur sayılacaqdı?
– 1 xaldan məmnun olmazdım. Çünki oyun başlayandan qələbəyə daha yaxın idik. Hələ VAR 2 qolumuzu ləğv etdi.

– Hər qələbə sizi çempionluğa yaxınlaşdırır, yoxsa "Qarabağ"ın olduğu yerdə bu, mümkün deyil?
– "Qarabağ" çox böyük keyfiyyətə malikdir. Bu, faktdır. Biz oyundan-oyuna irəliləyirik. Heç vaxt nə baş verəcəyini deyə bilmərik. Gələcəkdə nə olacaq, o haqda çox da fikirləşmirik. Sabahdan "Qarabağ"la oyuna hazırlaşacağıq. Çünki onlar növbəti rəqibimizdir.