Azərbaycanın peşəkar kikboksçusu Bəhram Rəcəbzadə "Glory" turnirində çempionluq kəməri üçün döyüşmək şansını itirib.

Prosport.Az-ın xəbərinə görə, 33 yaşlı "Altın qurd" ləqəbli idmançı Xorvatiyanın paytaxtı Zaqrebdə keçirilən "Glory 95" turnirinin əsas görüşündə niderlandlı Levi Rixterslə görüşüb.

3-cü raundda onun qaşı yarılıb və qanı saxlamaq qeyri-mümkün olduğundan, görüş yarımçıq saxlanılıb və texniki qələbə "Hakim" ləqəbli 29 yaşlı rəqibinə verilib. Bu, Bəhram Rəcəbzadənin peşəkar kikboksinq karyerasında 4-cü, ardıcıl 2-ci məğlubiyyəti olub.

Qeyd edək ki, bu döyüşün qalibi dekabrın 7-də Niderlandın Arnhem şəhərində "Glory Collision 7" turniri çərçivəsində yerli idmançı Riko Verhuvenlə kəmər görüşünə çıxacaqdı. Beləliklə, "Kikboksinqin kralı" ləqəbli idmançı çempionluq titulunu həmyerlisi Levi Rixterslə döyüşdə qorumağa çalışacaq.