"Turan Tovuz" Misli Premyer Liqasının VII turunda doğma meydanda "Araz-Naxçıvan"a 1:2 hesabı ilə məğlub olub.

Prosport.Az xəbər verir ki, qərb bölgəsi təmsilçisinin baş məşqçisi Qurban Berdiyev matçdan sonra keçirilən mətbuat konfransında jurnalistlərin suallarını cavablandırıb:

– Bu gün rəqibimiz qələbəyə daha çox layiq idi. Onlarda hamı bir nəfər kimi mübarizə aparırdı. Biz bundan nəticə çıxarmalıyıq. Paltardəyişmə otağında bu barədə futbolçularıma bildirdim.

– Komanda bu məğlubiyyətdən hansı nəticələri çıxarmalıdır?
– Komada 6 turdur ki, lider idi. Bu da uşaqlara psixoloji yük verə bilərdi. Ona görə də futbolçularım oyunlara daha çox fokuslanmalıdır.

– Roderik Milerə qarşı qayda pozuntusu olan epizodu necə şərh edərdiniz? Sizcə, orada qırmızı vərəqə vermək olardı?
– Mənim üçün nəsə demək çətindir. Hakim belə qərar verdi.

– Aleks Souza zədələnib. Hücumda sıxıntı hiss edirsiniz?
– Sözsüz ki, Aleksin yoxluğu hiss olunurdu. O, yaradıcı hücumçudur. Amma futbolda zədə qaçılmazdır. Bu oyun ən çox narazı qaldığmız matç oldu. Planlaşdırdığmız çox şeyi edə bilmədik. "Araz-Naxçıvan" bir çox komponentdə bizi üstələdi.