"Kəpəz" Misli Premyer Liqasının VII turunda Tovuzda "Şamaxı"ya 0:2 hesabı ilə uduzub.

Prosport.Az xəbər verir ki, Gəncə təmsilçisinin baş məşqçisi Azər Bağırov matçdan sonra keçirilən mətbuat konfransında jurnalistlərin suallarını cavablandırıb:

- Komandada vəziyyət elədir ki, oyunlara tam adaptasiya ola bilmirik. Bəzi şeyləri dəyişmək istəmişik. Amma oyunda alınmır. Bu gün müdafiədə çox kobud səhvlərə yol verdik. Belə qollar buraxanda komanda təzyiq altına düşür. Uşaqlar bu təzyiqdən çıxa bilmədilər. İkinci hissədə bəzi şeyləri dəyişmək istədik. Amma alınmadı. Komada qol vura bilmir. Hücumda çox şeyi dəyişməliyik.

- Azarkeşlərin "İstefa" şüarlarına münasibətiniz necədir?

- Mən güclü adamam. Dəyişikliklər edəcəyik. Hamını komandaya dəstək olmağa səsləyirəm. Düşünürəm ki, yaxşı oyunlarımız olacaq. Bir neçə oyunçu da bizə qoşulacaq. Qol vurmaq lazımdır ki, üstünlük səndə olsun. Bunun üzərində çox işləməliyik. Bizim problemimiz müdafiə deyil, hücumdur. Vaxtında qol vura bilmirik. Bunun nəticəsində də müdafiə təzyiq altında olur.

- Qarşıda "Qarabağ", "Neftçi", "Zirə" və "Turan Tovuz"la oyunlar var. Bu matçlardan gözləntiləriniz nədir?

- Bu, futboldur. Səhvlərin üzərində işləyəcəyik. Həmin səhvləri aradan qaldırandan sonra nəticələr də gələcək. Ümid etməli deyilik, iş görməliyik. Bilməliyik ki, tutduğumuz yol düzdür. Futbolçularımızı kiçiltmək istəmirəm. Taktiki planda iş görməliyik. Tribunadakı şüarlar futbolçulara da təsir edir. "İstefa" şüarları, futbolçuların ünvanına deyilən sözlər... Əlimizdə olan futbolçular bunlardır. Onlarla bu vəziyyətdən çıxmalıyıq. 

- Elmir Tağıyevin durumu necədir?

- Zədəsi ciddidir. MRT müayinəsindən sonra daha dəqiq bilinəcək.