15 yaşadək qız futbolçulardan ibarət millimiz (U-15) Belarusun paytaxtı Minskdə təşkil olunan UEFA İnkişaf Turnirində bu gün ilk oyununu keçirib.

Prosport.Az xəbər verir ki, millimiz Belarus Futbol Federasiyasının Futbol Kompleksində meydan sahiblərinin müvafiq yaş qrupundan ibarət komandası ilə qarşılaşıb.

Görüş Belarus komandasının millimizi darmadağın etməsi ilə nəticələnib – 8:1. Belaruslulardan Anna Yefremenko het-trikə, Anastasiya Tuz dubla, Mariya Butoviç və Kseniya Bibilo hərəyə 1 qola imza atıb. Daha 1 qolu millimiz öz qapısından keçirib. Millimizin heyətində yeganə qolu isə 86-cı dəqiqədə Könül Hüseynova vurub.

Turnir çərçivəsində bu gün keçirilən digər oyunda Rusiya yığması da Özbəkistan seçməsini darmadağın edib – 9:0.

Qeyd edək ki U-15 millimiz növbəti oyununu sentyabrın 19-da Özbəkistan yığmasına qarşı keçirəcək.