"Azər Bağırova və "Kəpəz"ə uğurlar arzulayıram. Çətin oyun olacağını gözləyirdik. "Kəpəz" neçə turdur uduzur. Nə vaxtsa, bu seriya qırılmalıdır. Uşaqlar sağ olsunlar, hamısı sona qədər oynadı. Birinci hissədə oyuna diqtə edirdik, yaxşı hücumlar qururduq, amma son nöqtəni qoya bilmirdik. Bəxtsizlik var idi. İkinci hissəyə də eyni başladıq. Dəyişikliklərdən sonra qol vurduq və qalib gəldik.

Prosport.Az xəbər verir ki, bu sözləri "Araz-Naxçıvan"ın məşqçisi Rasim Ramaldanov Misli Premyer Liqasının VI turunun "Kəpəz"lə görüşündən sonra keçirilmiş mətbaut konfransında deyib.

O, jurnalistlərin suallarını cavablandırıb:

- Qələbələrin davamının gəlməsi üçün nə edəcəksiniz?

- Dayanmalı deyilik. Qələbələr qazansaq da, davam etməliyik. Səhvlərimiz var, onların üzərində işləməliyik. Bir az da yaxşılaşdırmalıyıq. Bu, komandanın pik həddi deyil.

- Avrokuboklar zonasında sona qədər qala biləcəksiniz?

- Avrokuboklardan konkret heç nə danışmaq istəmirəm. Amma komandamıza inanırıq. Yaxşı futbolçularımız var. İddialı komanda görəcəyik. Qarşıdakı oyunları fikirləşib, hazırlaşırıq.