"Qarabağ"ın 16 yaşadək (U-16) futbolçulardan ibarət komandası İtaliyanın Neapol şəhərində keçirilən "Blue Devils Cup" beynəlxalq turnirində son 3 matçda qalib gəlib.

Prosport.Az-ın xəbərinə görə, C qrupunda daha əvvəl "Tor Tre Teste"yə 0:1 və "Benevento"ya 1:3 uduzmuş "Qarabağ" İtaliyanın "Sanseverineze" komandasını məğlub edib – 3:1 (Qollar: Kənan İsmayılov, Amin Rzayev, Murad İbrahimli – Petti).

Qrupda 3 xalla 3-cü olan Ağdam təmsilçisi turnirin reqlamentinə əsasən yoxlama oyunlarına çıxıb. Asif Əlizadənin baş məşqçisi olduğu komanda əvvəlcə F qrupunun 3-cüsü "Levante Adzurro" (İtaliya) ilə 1:1 oynayıb (Qollar: Daddario – Hüseyn Bayramov). Penaltilərdə "Qarabağ" 4:2 qalib gəlib.

Sonuncu gündə isə "Qarabağ" B qrupunun sonuncusu "Karlin Muzane" (İtaliya) komandasını böyük hesabla məğlub edib – 4:1 (Qollar: Vidoni – Əli Bəşirov (2), Murad İbrahimli, Adəm Qafarov).

Qeyd edək ki, turnirin qalibi "Roma" olub. Bu komanda finalda "Fyorentina"nı 3:0 hesabı ilə məğlub edib.