Azərbaycanlı kikboksçu Bəhram Rəcəbzadənin “Glory”də növbəti döyüşünün vaxtı bilinib.

Prosport.Az xəbər verir ki, 32 yaşlı idmançı ağır çəkidə reytinqin 1-cisi olan niderlandlı, "Hakim" (The Judge) ləqəbli Levi Rixterslə üz-üzə gələcək.

"Glory 95" turniri çərçivəsində keçiriləcək döyüş sentyabrın 21-də Xorvatiyanın paytaxtı Zaqrebdə keçiriləcək. 29 yaşlı Levi Rixters indiyə kimi peşəkar rinqdə 20 görüşdə 18 qələbə, 2 məğlubiyyətlə yadda qalıb.

Bu döyüşün qalibi isə “Collision 7” turnirində “kikboksinqin kralı” adlandırılan digər niderlandlı Riko Verhuvenlə dünya kəməri uğrunda görüşə çıxacaq. Həmin qarşılaşma dekabrın 7-də Niderlandda keçiriləcək.

Qeyd edək ki, Bəhram Rəcəbzadə peşəkar rinqdə 72 döyüş keçirib. O, bunların 69-da qələbə qazanıb, 3-də isə məğlub olub.