Sabah Bakıda start götürəcək 3x3 basketbolu üzrə Qadın Seriyasının mərhələ yarışı iştirakçılarının sayında dəyişiklik olunub.

Prosport.Az-ın xəbərinə görə, Bakı mərhələsində 16 yox, 15 komanda mübarizə aparacaq.

Belə ki, Fransa və Sinqapur milliləri, o cümkədən Azərbaycanın "Baku Fleyms" komandası bu yarışda çıxış etməyəcək. Onların əvəzinə Almaniyanın güclü "Düsseldorf ZOOS" və İspaniyanın "Loqrono Sentral" klubları mübarizə aparacaq.

Fransa millisinin isə son anda Azərbaycandakı yarışdan imtinasının səbəbi bəlli olub. Azərbaycan Basketbol Federasiyasının icraçı vitse-prezidenti Fərrux Mahmudovun saytımıza açıqlamasına görə, Paris Olimpiadasında millimizin də yer aldığı yarışda Fransa millisinin sonuncu olması federasiyanın Bakı mərhələsindən çəkilməsinə səbəb olub. Bu barədə Fransa Basketbol Federasiyasından qarşı tərəfə müraciətdə bildirilib.

Beləliklə, 17-18 avqustda keçiriləcək yarışda meydan sahibi Azərbaycan millisi ilə yanaşı, Niderland, İspaniya, Polşa, İtaliya, Portuqaliya, Ukrayna, Filippin, Avstriya, İrlandiya yığmaları və Çinin 24 yaşadək komandası, o cümlədən, "Düsseldorf ZOOS" (Almaniya), "Dyör" (Macarıstan), "Maebaşi Flouliş EXE" (Yaponiya) və "Loqrono Sentral" (İspaniya) klubları mübarizə aparacaq. Almaniya klubuna Azərbaycan, Yaponiya və İspaniya klublarına FIBA bu yarış üçün "vayldkard" verib. Yalnız "Dyör" digər millilər kimi reytinqlə bu mərhələdə iştirak hüququ əldə edib.

Qeyd edək ki, sabah yarışa A qrupunun Ukrayna – İrlandiya görüşü ilə start veriləcək. Nardaran qəsəbəsindəki "See Breeze"də keçiriləcək yarış saat 10:00-da başlayacaq. C qrupunda yer alan millimiz turnirin 3-cü komandası sayılan "Düsseldorf ZOOS"la saat 16:50-dən etibarən görüşə çıxacaq.

Səbuhi Musa