Albaniyanın Elbasan şəhərində 18 yaşa qədər (U-18) oğlanlar arasında keçirilən basketbol üzrə Avropa çempionatı (EuroBasket) C divizionunda Azərbaycan millisi Lüksemburqa 77:71 hesabı ilə qalib gəlib.

Prosport.Az xəbər verir ki, millimizin türk basketbolçusu Dərin Bərkoz turnirin ən yaxşı oyunçusu seçilib.

Qeyd edək ki, Azərbaycanın U-18 millisi son olaraq 2016-cı ildə Avropa çempionatı C divizionunun qalibi olmuşdu.

Azərbaycanın qızlardan ibarət U-18 basketbol millisi isə Avropa çempionatının (EuroBasket) C divizionunun 2-cisi olub. Kosovonun paytaxtı Priştinada keçirilən qitə turnirinin finalında Kosovo ilə üz-üzə gələn yığmamız 65:75 hesabı ilə məğlub olub.

Xatırladaq ki, Evren Alkayanın rəhbərlik etdiyi yığmamız ötən il çempion olmağı bacarmışdı.

10:40

Azərbaycanın 18 yaşadək oğlanlar və qızlardan ibarət basketbol milliləri Avropa çempionatının C divizionunda bu gün final matçlarına çıxacaqlar.

Prosport.Az xəbər verir ki, Evren Alkayanın rəhbərlik etdiyi qızlardan ibarət komanda Kosovonun paytaxtı Priştinada təşkil olunan yarışın həlledici mərhələsində ev sahibi yığma ilə üz-üzə gələcək.

Anar Sarıyevin baş məşqçisi olduğu digər yığma Albaniyanın Elbasan şəhərindəki turnirin eyni raundunda Lüksemburqun müqavimətini qırmağa çalışacaq.

Qeyd edək ki, qarşılaşmalar müvafiq olaraq Bakı vaxtı ilə saat 21:30-da və 21:00-da start götürəcək.