Ötən mövsüm kişi həndbolçular arasında ölkə çempionu olmuş "Kür" komandası 9 oyunçu ilə yollarını ayırıb.

Prosport.Az-ın xəbərinə görə, Mingəçevir komandası Kamil Məmmədzadə, Nikola Mitroviç, İlya Ulyanov, Denis Dulov, Aleksandar Milenkoviç, Abubakar Sandi Atabo, Raul Muradov, Cozef İqvekire və Rəsul Şərifliyə növbəti karyeralarında uğurlar arzulayıb.

Qeyd edək ki, "Kür" yeni mövsümdə Azərbaycanı Avropa Kubokunda təmsil edəcək. İlkin təqvimə əsasən komanda bu turnirin II mərhələsində 19/20 oktyabrda Nikosiya şəhərində "Parnassos Strovolu"nun (Kipr) qonağı olacaq. Cavab qarşılaşması 26/27 oktyabrda Mingəçevirdəki "Kür" Olimpiya Tədris İdman Mərkəzində baş tutacaq.  

Xatırladaq ki, Azərbaycan Kubokunun qalibi olmuş "Kür"ün qadın komandası da dünən 6 oyunçu ilə yollarını ayırıb.