Sentyabrın 10-23-də Macarıstanın paytaxtı Budapeştdə keçiriləcək Ümumdünya Şahmat Olimpiadasında iştirak edəcək Azərbaycan milli komandasının heyəti açıqlanıb.

Teymur Rəcəbovun kapitanlıq edəcəyi komandaya Şəhriyar Məmmədyarov, Rauf Məmmədov, Nicat Abasov, Aydın Süleymanlı və Məhəmməd Muradlı daxil edilib. Maraqlıdır ki, millinin aparıcı üzvlərindən olan Vasif Durarbəyli siyahıya daxil edilməyib.

Prosport.Az xəbər verir ki, qrosmeyster özü də bu məsələyə səssiz qalmayıb. Durarbəyli sosial media hesabında paylaşım edərək federasiya prezidenti Mahir Məmmədovu günahlandırıb:

"Tənqidi fikirlərimə görə Azərbaycan Şahmat Federasiyasının prezidenti  Mahir Məmmədov məni yığma komandadan kənarlaşdırdı. Reytinq sıralamasında üçüncü yeri tutduğum halda, beş nəfərlik komandaya daxil edilmədim.

Ötən illərdə yığmanın oyunçuları reytinq sıralaması ilə seçilirdi. Yalnız 2023-cü ildə ölkə çempionatından vəsiqə verilmişdi, amma bu qayda  davam etdirilmədi. 

Qadınlardan ibarət yığma komanda bu il də sırf reytinq sıralaması ilə qurulub. Fəqət, reytinq meyarı kişi komandasına şamil edilməyib.

Yığmanın seçimi idarəçinin subyektiv qərarları ilə qurulmamalıdır! İdarəçi obyektiv meyarları öncədən təyin etməli və yığma həmin meyarlarla formalaşmalıdır. 

Reytinq şahmat ictimaiyyəti tərəfindən gücün obyektiv göstəricisi hesab edilir. Yeganə kritika reytinqin oynamadan belə  saxlanılma imkanı idi. Bunun qarşısını almaq üçün federasiya son Avropa çempionatından bəri azı 18 oyun keçirmə tələbini qoymuşdu. Mən 18 yox, 40 klassik partiya oynayaraq reytinqimi sabit saxlamışam.

Yuxarıda sadalananlar nəzərə alınsaydı, komandada qalardım. Əfsuslar olsun ki, cənab Məmmədovun şəxsi qərəzi onun ədalət anlayışını əydi.

Cənab Məmmədov məni mətbuata müsahibələr verdiyim təqdirdə əməkdaşlığın kəsiləcəyi ilə hədələmişdi. Azad fikir söyləməyi üstün tutdum. Açığı, əməkdaşlığın bitməsinin yığmaya  dəvət edilməyəcəyim mənasına gələcəyini düşünmədim. Reytinqim yüksək olarsa, komandada qalacağımı zənn edirdim.

May ayındakı son danışığımızda cənab Məmmədov mənim ictimai çıxışlarımın komandaya çağırılmama səbəb ola biləcəyinə eyham vurmuşdu. Bununla belə, yaxşı oynayacağım təqdirdə komandaya dəvət ediləcəyimə məni inandırdı.

Danışıqdan sonra bir açıq turnirdə qələbə qazandım. Dünən bitən güclü turnirdə liderlik uğrunda mübarizədə idim. Həmin yarışın bitməsini belə cənab Məmmədov gözləmədən heyəti elan etdi! Görünür, son danışığımızdakı vəd baş qatmaqdan başqa bir şey deyildi.

2022-ci ildə  komanda ilk olimpiada medallarına çox yaxın idi. Bu il yığmanın tərkibinə daxil olaraq, ilk medalı qazanmaq arzusunda idim. Amma cənab Məmmədov bu arzunu nakam qoydu.
İstənilən halda yığma komandalarımıza olimpiadada uğurlar arzu edirəm! Yenə də hər cür dəstəyi verməyə hazır olduğumu vurğulamaq istəyirəm".