"Binə qəsəbə stadionunda bizə yer veriblər. Ötən mövsüm ev oyunlarımızı orada keçirdik. Eşitdiyimə görə, ora da indi təmirə bağlanıb".

Bunu Prosport.Az saytına açıqlamasında Mərkəzi Ordu İdman Klubunun (MOİK) rəisi, polkovnik-leytenant Ramiq Orucov deyib.

26 İyun – Azərbaycan Respublikası Silahlı Qüvvələr Günü münasibəti ilə MOİK rəhbərliyindən müsahibə götürdük. Klub növbəti mövsüm futbol üzrə Azərbaycan Premyer Liqasına lisenziya almaq istəyir:

"Ötən mövsüm 3-cü yeri tutduq. Ancaq lisenziya ala bilmədik. Bu da əsasən öz bazamızın olmaması ilə bağlı idi. Düşünürəm ki, növbəti mövsüm üçün Premyer Liqaya lisenziya ala biləcəyik. Çünki yeni baza tikintisi nəzərdə tutulub".

Yeni mövsümdən MOİK və Lənkəran komandaları Azərbaycan Basketbol Liqasında mübarizə aparacaq. Bununla bağlı da Ramiq Orucovun fikirlərini öyrəndik:

"Azərbaycan Basketbol Federasiyasının prezidenti cənab Emin Əmrullayevin iclaslarında iştirak etmişik. 100% biz bu çempionatda iştirak edəcəyik. İyulun sonları – avqustun əvvəllərində maliyyə məsələləri müzakirə olunacaq. Ev oyunlarımızı Fövqəladə Hallar Nazirliyinin Hövsandakı arenasında keçirəcəyik. Həmçinin, kişilərdən ibarət voleybol komandamız çıxışını növbəti mövsüm davam etdirəcək. Həndbolda isə hələ ki çıxışımız nəzərdə tutulmayıb. Bu da baza məsələsi ilə bağlıdır. Öz bazamız olduqdan sonra digər komanda idman növlərində də, təklif olarsa, çıxış edə bilərik".

Səbuhi Musa