3x3 basketbolu üzrə millilərimiz Avropa Kubokuna vəsiqə qazanıb.

Prosport.Az xəbər verir ki, Kosovonun paytaxtı Priştinada keçirilən seçmə mərhələdə mübarizə aparan qadın millimiz yarımfinalda Maltanı 15:10, finalda isə Kipri 21:12 məğlub edərək ilk dəfə Avropa Kubokunda çıxış etmək imkanı əldə edib.

Kişi yığma komandamız isə yarımfinalda İrlandiyaya 21:12 və finalda Kiprə 20:18 qalib gələrək 2-ci dəfə Avropa Kubokuna vəsiqə qazanıb.

Qeyd edək ki, Avropa Kuboku 22-25 avqustda Avstriyanın paytaxtı Vyanada keçiriləcək.

15:44

3x3 basketbolu üzrə millilərimiz Kosovonun paytaxtı Priştinada keçirilən Avropa Kubokunun təsnifat mərhələsində qrup lideri olub. 

Prosport.Az xəbər verir ki, qadın millimiz 2-ci oyun günündə A qrupunda sonuncu oyununu Lüksemburqa qarşı keçirib və 21:8 hesablı qələbə qazanaraq, qrup lideri olub. Bu yığmamızın yarımfinal oyunu bu gün Bakı vaxtı ilə saat 19:50-də baş tutacaq.

Kişilərdən ibarət millimiz isə B qrupunda son görüşünü Albaniya yığmasına qarşı keçirib və rəqibinə 21:13 hesabı ilə qalib gəlib. Bununla da bütün görüşlərini qələbə ilə başa vuran yığmamız qrup lideri olub. 

Hər iki komandamız qrup lideri olduğundan, birbaşa yarımfinala vəsiqə qazanıb. Qadın millimiz bu gün Bakı vaxtı ilə saat 19:50-də, kişi yığmamız isə saat 21:15-də yarımfinal görüşünə çıxacaq. Onların rəqibləri bu gün keçiriləcək 1/4 final qarşılaşmalarından sonra bilinəcək.

Qeyd edək ki, təsnifat mərhələsinin qalibi 22-25 avqustda Avstriyanın paytaxtı Vyanada keçiriləcək Avropa Kubokuna vəsiqə qazanır.