2-3 iyunda Qəbələdə keçiriləcək 3x3 basketbolu üzrə Qadın Seriyasının 3-cü mərhələ yarışının bütün iştirakçıları müəyyənləşib.

Prosport.Az xəbər verir ki, son olaraq Polşanın "Varşava Lotto" klubu çıxışını təsdiqləyib. Bu isə o deməkdir ki, Polşanın meydan sahibi Azərbaycan kimi 2 təmsilçisi çıxış edəcək.

Beləliklə, Qəbələdəki yarışda 5 milli komanda – Azərbaycan, Polşa, İtaliya, Portuqaliya, Rumıniya yığmaları və 3 klub – "Varşava Lotto" (Polşa), "Barselona Panters" (İspaniya) və "Baku Fleyms" (Azərbaycan) komandaları mübarizə aparacaq.

Bundan başqa, Olimpiadada Azərbaycanı təmsil edəcək millimizin Fransanın Klermon-Feron (14-15 iyun) və Macarıstanın Debretsen (24-25 avqust) şəhərlərindəki mərhələ yarışlarında çıxışı dəqiqləşib.

Azərbaycanda keçiriləcək Quba mərhələsində (20-21 iyul) Çexiya və Çinin 24 yaşadək millisinin və Bakı mərhələsində (17-18 avqust) Fransa, Avstriya milliləri və Macarıstanın "Dyör" komandasının iştirakı müəyyənləşib.

Qeyd edək ki, 7-8 sentyabr tarixlərində mərhələ yarışlarında yüksək nəticə göstərmiş komandalar Çinin Hançjou şəhərində final yarışına çıxacaq.