"Göyqurdlar" azarkeş qrupu bəyanat yayıb.

Prosport.Az xəbər verir ki, bəyanatda ötən gün kişi voleybolçular arasında Qızıl Avropa Liqasının Azərbaycan - Rumıniya oyununda baş vermiş xoşagəlməz hadisə tənqid olunub:

"Voleybol milli komandamızın oyununda bannerimizə və üzvlərimizə qarşı edilən hərəkəti qınayırıq!

Azərbaycan Voleybol Federasiyası tərəfindən üzərində himnimizin yazıçısı olan Əhməd Cavadın "Azərbaycan bayrağına" şeirindən bir bəndin yazılı olduğu "Göyqurdlar" bannerini yığışdırmağımız tələb edildi.

Canlı yayımdan göründüyü kimi, bannerimiz asılı vəziyyətdə heç də tam görünmürdü. Yalnız şeirin 1-ci və 2-ci misralarında olan "Türküstan yelləri öpüb alnını, Söylüyor dərdini sana bayrağım" oxunur. "Azərbaycan bayrağına" şeirinin 2 misrasından bu qədər qorxduğunuzu bilsəydik, heç arenaya gəlməzdik. Tələbə və işləyən üzvlərimiz dərslərindən, işlərindən erkən çıxaraq, qarşılıqsız üçrəngli bayrağımıza dəstək vermək üçün gəlmişdilər.

Bannerimizin sökülməsi kimi hörmətsizliyi qəbul etməyərək arenanı tərk etdik. "Azərbaycan bayrağına" şeiri və bizim bannerimiz ilə problemi olanları dövlət bayrağındakı 1-ci rəngin mənasını və Əhməd Cavadın kim olduğunu öyrənməyə dəvət edirik.

2010-cu ildən başlayaraq "Sector 11" adı ilə 11-ci sektordan çıxdığımız bu yolda illərlə qızmar istinin, yağışın altında, heç kimdən pul almayaraq, qarşılıqsız olaraq yalnız Azərbaycan bayrağı naminə milli komanlarımızı və klublarımızı beynəlxalq yarışlarda dəstəkləmişik. Getdiyimiz hər yerdə də çox gözəl və hörmətlə qarşılanmışıq. Biz, nə heç kimin dəvəti ilə bir yerə getmişik, nə də istənilmədiyimiz yerdə qalmışıq.

Bu gündən etibarən voleybol milli komandalarımızın bütün oyunlarını boykot edərək oyunlara getməyəcəyimizi bəyan edirik".