"İlk olaraq “Sabah” klubunu təbrik edirəm. Həqiqətən də yaxşı mübarizə apardılar. Hər iki kollektiv çempionluğa layiqdir".

Prosport.Az xəbər verir ki, bu sözləri “Xəzri” komandasının baş məşqçisi Murat Dikmen Azərbaycan Basketbol Liqasının final seriyasında “Sabah”a 95:75 hesabı ilə qalib gəldikləri matçdan sonra klubun mətbuat xidmətinə açıqlamasında deyib.

Türkiyəli mütəxəssis bu matçda çox yaxşı performans sərgilədiklərini bildirib: "Yaxşı müdafiə olunduğumuzu düşünürəm. Pley- off seriyasında orta hesabla 66.6 xal buraxmışdıq. Bu matçda da rəqibi 70 xalda saxlaya bildik. Hər zaman dediyim kimi, yaxşı müdafiə olunduğumuz zaman hücumda daha uğurlu çıxış edirik. Oyunçularımın hər birini təbrik edirəm. Hücumda 95 xal qazandıq. Bu da bizim üçün çox vacib idi. Buna görə də xoşbəxtəm. Köməkçi məşqçimizə və digər texniki komandama çox sağ ol deyirəm. Bu matça yaxşı hazırlaşmışdılar".

Artıq seriyada 1:0 öndə olduqlarını xatırladan Dikmen deyib ki, bu görüşü unudub növbəti qarşılaşmanı düşünməlidirlər: "Çünki önümüzdə uzun bir seriya var. Hər oyuna ayrı konsentrasiya ilə hazırlaşacağıq. Bugünkü səhvlərimizdən dərs alaraq növbəti görüşə fərqli şəkildə çıxacağıq. Ümid edirəm ki, oyunumuzu bu cür davam etdirərik. Pley-offlar fərqli yerdir. Hər zaman istədiyiniz performansı göstərə bilməzsiniz. Final seriyası çox uzundur. Burada həm fiziki, həm də mental olaraq hansı komanda daha yaxşı çıxış etsə, o da çempion olacaq".