Tüklə kənd məktəbinin dil-ədəbiyyat müəllimi Heybət Əhədovun xatirəsinə voleybol yarışı keçirilib.

Prosport.Az xəbər verir ki, Milli qəhrəman Mübariz İbrahimovun adını daşıyan idman kompleksin voleybol zalında Tüklə kəndinin veteran və gənc voleybolçuları 6 komandada birləşərək Azərbaycan İdman Jurnalistləri Assosiasiyasının (AİJA) media dəstəyi ilə yarışıb.

"Dövlətimizin idman siyasətinin ana xətti Azərbaycanda bədən tərbiyəsi və idmanın kütləviliyinin təmin edilməsidir desək, yanılmarıq. Dövlət tərəfindən idmanın kütləviliyi təmin edilərək ölkədə sağlam nəslin formalaşdırılmasına xüsusi önəm verilir. Sözsüz ki, bu formalaşdırılırmış nəsil də vətənimizin sağlam gələcəyi deməkdir. Bu sahədə Tüklə sakinlərinin də rolu danılmazdır. Bizim mərhum, sevimli, əsl el hörməti qazanan Heybət müəllim Tüklədə bu işin önündə addımlayıb. Bu gün də onun işığına topaşmışıq. Tükləlilərin bu təşəbbüsünü alqışlayıram", – deyə toplananlar qarşısında çıxışını tamamlayan AİJA prezidenti, Azərbaycan Milli Olimpiya Komitəsinin və Beynəlxalq İdman Mətbuatı Assosiasiyasının (AIPS) üzvü olan Əməkdar jurnalist Eldar İsmayılov yarışa qatılan tükləlilərə uğurlar arzulayıb.

Qeyd edək ki, Heybət Əhədovun yetirməsi, peşəkar idmançı, tədbirə hakimlik edən Vüqar Mənsimov start fiti ilə müəlliminin xatirə yarışına start verib.