Azərbaycanda yeni komanda yaradılıb.

Prosport.Az-ın xəbərinə görə, bu, "Baku Fleyms" (Baku Flames) adlı 3x3 qadın basketbolu komandasıdır.

Məhz "Baku Fleyms" 3x3 basketbolu üzrə Qadın Seriyası turnirinin 3-cü mərhələsi olan Qəbələdə (2-3 iyun) debüt edəcək. Əldə etdiyimiz məlumata görə, bu komandada ötən mövsüm Azərbaycan millisi adından oynamış basketbolçuların bəziləri çıxış edəcək. Bunlar Sali Əl-Xuri, Ləman İbrahimova, Binata Rizvanova, Nailə Əlisultanova, Həvva Nastakalova və Evelina Yaşayevadır.

Həmçinin, "Baku Fleyms"in 20-21 iyulda Quba və 17-18 avqustda Bakı mərhələsində də çıxış edəcəyi dəqiqdir.

Qeyd edək ki, ötən mövsüm bu turnirdə Azərbaycanı klub kimi "Neftçi" uğurla təmsil edib. Hazırda "Neftçi"nin tərkibindəki oyunçular yeni mövsümdə Azərbaycan millisi adından çıxış edəcək.

Onu da bildirək ki, bu turnirin hər mərhələsində qalib komanda 14 min, 2-ci yer 10 min, 3-cü yer 8 min, 4-cü yer 6 min, 5-ci yer 4 min, 6-cı yer 3 min, 7-ci yer 2 min və 8-ci yer 1000 dollar əldə edir.