Bakı kənd və qəsəbələri arasında 2-ci minifutbol turniri başa çatıb.

Prosport.Az xəbər verir ki, Bakı Tennis Akademiyasının stadionunda keçirilən finalda "Yeni Günəşli" və "Aşağı Güzdək" komandaları üz-üzə gəlib.

"Yeni Günəşli" rəqibini 7:0 hesabı ilə üstələyərək çempion olub. Kuboku gənclər və idman naziri Fərid Qayıbov təqdim edib.

3-cü yer uğrunda qarşılaşmada isə “Biləcəri” və “Mərdəkan” münasibətlərə aydınlıq gətirib. Əsas vaxt heç-heçə (4:4) ilə yekunlaşdığı üçün penaltilər seriyasına ehtiyac duyulub. Daha dəqiq oynayan (3:1) "Mərdəkan" futbolçuları 3-cü yeri tutub.

Turnirin ən yaxşı oyunçusu Heydər Mustafayev ("Yeni Günəşli"), bombardiri Emil Rəsulov ("Yeni Günəşli"), ən yaxşı qapıçısı isə Tahir Məmmədov ("Mərdəkan") seçilib.

"Biləcəri"yə 500, "Mərdəkan"a 1500, "Aşağı Güzdək"ə 2 min və "Yeni Günəşli"yə 3 min manat mükafat təqdim olunub. Həmçinin, Bakı Abadlıq Xidməti tərəfindən turnirdə iştirak edən bütün uşaqlara velosiped hədiyyə edilib.

Mükafatlandırmada gənclər və idman naziri Fərid Qayıbov, AFFA-nın icraçı vitse-prezidenti və baş katibi Sərxan Hacıyev də iştirak edib.

Qeyd edək ki, Gənclər və İdman Nazirliyi, AFFA və Bakı Abadlıq Xidmətinin birgə təşkilatçılığı ilə keçirilən yarışlarda paytaxtın kənd və qəsəbənin 2012-2013-cü il təvəllüdlü uşaqlardan ibarət 32 komandası mübarizə aparıb.