“Xəzri”nin baş məşqçisi Murat Dikmen Azərbaycan Basketbol Liqasında müntəzəm mövsümün sonuncu - XVIII turunda “Sabah”a 65:77 hesabı ilə uduzduqları matçdan sonra klubun mətbuat xidmətinə açıqlama verib.
Prosport.Az xəbər verir ki, türkiyəli mütəxəssis matç ərzində çox top itkisi ilə oynadıqlarını bildirib:
"22 top itkisi etmişik. Bu da görüşə çox təsir göstərdi. Burada bütün oyunçular oyuna köklənmədə problem yaşadı. İlk periodda yaxşı mübarizə apardıq. İkinci periodda sükanı əldən versək də, üçüncü hissədə yaxşı təsir bağışladıq. Son periodda isə komandada yenidən eniş müşahidə olundu. Bu qarşılaşmada yerli basketbolçu sarıdan əziyyət çəkdik. Onlar bu gün sadəcə, 4 xalla dəstək ola bildilər. Əgər bu cür matçlarda da yerli basketbolçularımız yaxşı oynamırsa, qalib gəlmək şansımız aradan qalxır. Bu hər zaman belə olub. Buna görə də edə biləcəyimiz heç nə yoxdur. Bundan sonra komandamız pley-offda “Sərhədçi” ilə mübarizə aparacaq".
O, klubdakı vəziyyəti ilə bağlı hələ də dəqiq qərar verə bilmədiyini söyləyib: "Komandanın sükanı arxasında davam edib-etməyəcəyim hələ bəlli deyil. Qarşıda Türkiyə səyahətim var. Orada menecerimlə danışıb bəzi məsələləri dəqiqləşdirmək lazımdır. Çünki burada çox böyük haqsızlıqlar görürəm. Çalışma şərtləri, komanda qurularkən bizə verilən yerli oyunçular və mövsüm boyu yaşadığım problemlər artıq məni çox yorub. Mövsümün sonuna kimi dayana bildim. Pley-offlarla əlaqədar hələ konkret qərarımı verməmişəm. Bunu əminliklə deyə bilərəm. Xeyirlisi olsun. Mənə bu fürsəti verən klubunun direktoruna, oyunçularıma və federasiyaya çox təşəkkür edirəm. Bundan sonra da hər kəsə uğurlar".