Azərbaycan Basketbol Federasiyasında yeni icraçı direktorun adı müəyyənləşib.

Prosport.Az-ın xəbərinə görə, bu posta Anar Rza təyin olunub.

Qeyd edək ki, Anar Rza idmana yad sima deyil. O, 2011-2015-ci illərdə – Nikolay Adamın baş məşqçi olduğu dönəmdə futbol üzrə U-15, U-16, U-17 və U-19 komandalarının inzibatçısı işləyib. Həmçinin AFFA-da işlədiyi 2 il ərzində tərcüməçi funksiyasını da yerinə yetirib. 

2017-ci ildə İslam Həmrəyliyi Oyunları, 2019-cu ildə Avropa Gənclər Olimpiya Festivalı (EYOF) zamanı idman avadanlıqları üzrə mütəxəssis kimi fəaliyyət göstərib. 2021 və 2023-cü illərdə Bakıda keçirilmiş "Formula-1" yarışı zamanı şatl (daşınmanı həyata keçirən nəqliyyat) üzrə supervayzer olub.

Onun Basketbol Federasiyasına gəlişi ötən ilin aprelinə təsadüf edib. Ötən ilin dekabrında Səudiyyə Ərəbistanında keçirilmiş klublarası dünya çempionatında nəqliyyat üzrə menecer də işləmiş Anar Rza federasiyada sözügedən postadək beynəlxalq əlaqələr üzrə məsləhətçi vəzifəsində olub.

Bu yerdə bir məqamı da vurğulayaq ki, onun həyat yoldaşı Leyla Xəlilova-Rzazadə də artıq idmana tanış simadır. Bu ay AFFA İcraiyyə Komitəsinə üzv seçilmiş Leyla xanım eyni zamanda Elm və Təhsil Nazirliyinin Strateji planlaşdırma və icraya nəzarət şöbəsinin müdiri, “Yüksəliş” müsabiqəsinin qalibidir.

Xatırladaq ki, daha əvvəl bu postda Fərrux Mahmudov işləyib. O, ötən ilin iyulunda "Neftçi"yə baş icraçı direktor təyin edildikdən sonra həmin vəzifə boş qalmışdı.