"Qarabağ" FK Akademiyasının koordinatoru Aftandil Hacıyevin Prosport.Az saytına müsahibəsi
– Bu ay "Qarabağ"ın komandaları Qətərin paytaxtı Dohaya gedib orada çıxış etməli idi. Ancaq deyəsən, səfər planında dəyişiklik oldu...
– Bəli. Dəyişikliyə görə, mayın 18-dən 23-dək Qətərdə olacağıq. Amma hələ bu da təsdiq olunmayıb. Orada "Aspire Academy" ilə 2 oyun keçirəcəyik. Əvvəlcə, ora U-14 və U-15 komandalarımız getməli idi. Sonra deyildi ki, U-15 və U-17 komandalarımız orada iştirak edəcək.
– Başqa hansısa turnirlərdə iştirakınız gözlənilir?
– Təkliflər var. Yenə Belarusda, bu dəfə Minsk "Dinamo"sunun özünün təşkil etdiyi turnirdə çıxış edə bilərik. Bu, U-9-ların turniridir. Orada Rusiyanın ÇSKA, "Zenit", "Krasnodar" kimi komandaları iştirak edəcək. Hazırda ora komanda göndərib-göndərməmək barədə müzakirə aparırıq. "Samsunspor"un may ayında təşkil etdiyi turnirdə də iştirak edə bilərik.
– Fevral və mart aylarında "Qarabağ"ın 3 yaş qrupu Belarusun paytaxtı Minskdə keçirilən "Bizim gələcəyimiz" adlı turnirin qalibi oldu. Həmin turnirdəki çıxış, yarışın səviyyəsi haqda da fikirlərinizi öyrənərdik...
– U-13, U-14 və U-15 komandalarını "Hədəf" qrupları kimi seçmişik. Bu yaş qruplarından peşəkar futbolçuların çıxacağına ümidimiz böyükdür. Turnirdə nəticə bizim üçün o qədər də önəmli olmasa da, onların iştirakı vacib idi. Çünki indiyədək çox az turnirdə iştirak ediblər. U-14 komandası ümumiyyətlə, ilk dəfə beynəlxalq turnirdə çıxış edirdi. Bununla belə, onlar çempion oldular. U-15 yayda "Kartepe Cup"ın qalibi olmuşdu, o, 2-ci turnirləri idi...
İştirakçı 16 komandadadan 8-nin səviyyəsini eyni hesab etmək olar. İlk "8-lik"də qərarlaşan hər bir komanda çempion olmaq iqtidarında idi. Finalda BATE – "Qarabağ" yox, "Pskov" – "Sokol" oyunun olacağını gözləyənlər də vardı. Çünki həqiqətən 3-cü yer üçün oynayan bu komandalar da kifayət qədər keyfiyyətli idi. Düşünürəm ki, sonda xarakter göstərən komanda çempion oldu. Bunu da bizim uşaqlar bacardı.
– "Hekken"lə oyun zamanı siz də İsveçdə idiniz. Həmin vaxt daha səviyyəli, daha məşhur klubların qatıldığı "Gothia Cup" turnirinin direktoru Niklas Freyholtsla da görüşmüşdünüz. Bu turnirdə iştirakınız nə dərəcədə mümkündür?
– Onunla bağlı danışıqlarımız davam edir. Orada qeydiyyatdan keçmək üçün 1 il öncədən yazılmalısan. Bu il çatdıra bilmədik. Ola bilsin ki, növbəti mövsüm o turnirdə də çıxış edək.
– Son olaraq Maksim Medvedevin akademiyada məşqçi işləmək istədiyi və sizinlə bu barədə söhbət etdiyi bildirilir. Bu nə dərəcədə doğru informasiyadır?
– Maksimə biz tərəfindən konkret belə bir dəvət edilməyib. Amma "Qarabağ"da oynamış futbolçuların akademiyada qalıb işləməsi maraq dairəmizdədir. Maksimin marağı olsa, təbii ki, onunla söhbət etmək, akademiyada ona yer vermək istəyərik. Hazırda o, futbolçu karyerasını davam etdirir. Yayda karyerası ilə bağlı hansı qərarı verəcəyini biz də bilmirik. Ona görə də belə müzakirə olmayıb.
Səbuhi Musa