Bu ayın əvvəli verilən hesabatda AFFA-nın ötən il tərkibində olan federasiyaların, üzvlərin və akademiyaların saxlanılmasına ümumilikdə 3 039 586 manat xərclədiyi məlum oldu. Bunların içərisində futbol veteranı İsgəndər Cavadovun rəhbəri olduğu Regional Futbol Federasiyasına (RFF) 286 103 manat pul ayırılmışdı. Bunu başa düşmək olar. RFF AFFA-ya üzv təşkilatdır.
Bəs İsgəndər Cavadov adına Akademiyaya (İCBFA) niyə 9000 manat vəsait ayrılıb? Yəni indiyədək heç harda bu Akademiyanın AFFA-nın tərkibində olması barədə məlumat dərc olunmayıb və ya rəsmi şəkildə açıqlanmayıb. O zaman belə çıxır ki, bu 9000 manat İsgəndər Cavadov AFFA İcraiyyə Komitəsinin (İK) üzvü olduğu üçün bura yatırılıb. Xatırladım ki, 2019-cu ildəki hesabatda AFFA bu quruma 26 550 manat pul ayırıb. Hazırda II Liqada mübarizə aparan "Dinamo" klubunun rəhbəri Yaşar Seyidov o vaxt bu akademiyanın vitse-prezidenti kimi bunun səbəbini icarə haqqına və tibbi yardıma görə AFFA-dan kömək istəmələri ilə əlaqələndirib. Bir də bildirib ki, nəqliyyat xərclərinə görə AFFA Əsasnaməsində akademiyalara pul ayrılması nəzərdə tutulub.
Mövsümün əvvəlindən AFFA U-15 Liqasını diqqətlə izləyirəm. İCBFA-nın bəzi nəticələrini təqdim edirəm:
"Kəpəz" – İCBFA 7:0
"Səbail" – İCBFA 11:0
"Qarabağ" – İCBFA 11:0
İCBFA – "Zirə" 0:9
"Sabah" – İCBFA 12:0
"Neftçi" – İCBFA 11:0
İCBFA – "Qəbələ" 0:5
İCBFA – "Səbail" 0:4
İCBFA – "Sabah" 0:5
Futbol Akademiyalarına pul yatırılmağın tərəfdarıyam. Ancaq belə böyük hesablarla uduzan futbolçuların gələcəkdə hansı psixoloji durumda olduğunu, məğlub psixologiyası ilə böyüdüklərini anlamaq lazımdır. Həmin futbolçular üçün bu yaşdan məğlubiyyət sıradan bir hadisəyə çevrilir. Ya bu komanda özündən qat-qat güclü olan rəqiblərin yer aldığı çempionatda iştirak etməməli, ya da belə akademiyalara boşuna pul yatırılmamalıdır. Özü də söhbət təkcə İCBFA-dan getmir. Bu siyahıya EFA, "Lion", ASTA (sahibi SOCAR əməkdaşı kimi tanınmış Adnan Əhmədzadədir – red.), "Araz" (Saatlı), "Ulduz" (Mingəçevir) da aiddir. Pul nəticəsi olan yerə yatırıldıqda gözəldir.
Bəli, bu yazı orada işləyən məşqçilərin xoşuna gəlməyəcək. Ancaq hamı öz üzərində işləməlidir. Hamı aldığı pulun dəyərini verməlidir. Əgər kimsə aldığı maaşa görə dəyər görmədiyini iddia edirsə belə, orada qalıb işləməməlidir.
Səbuhi Musa
P.S. Əminəm ki, artıq bu akademiyaya daha pul ayrılmayacaq. Çünki artıq İsgəndər Cavadov İK-da üzv deyil, üstəlik, onun məlum son açıqlamalarından sonra (xüsusən Elşad Nəsirova qarşı) bu akademiyanın maliyyə imkanlarından məhrum olacağı dəqiqdir