"Neftçi" basketbol üzrə Azərbaycan Kubokunun yarımfinalında "Sərhədçi"yə 91:73 hesabı ilə qalib gələrək finala yüksəlib.

Prosport.Az xəbər verir ki, hər iki komandanın baş məşqçisi matçdan sonra klubun mətbuat xidmətinə öz fikirlərini bölüşüb.

Anar Sarıyev ("Neftçi"nin baş məşqçisi): "Uşaqları qələbə münasibətilə təbrik etmək istəyirəm. Çox yaxşı mübarizə apardılar və bunu sona kimi davam etdirdilər. Ən əsası isə komanda olmağı bacardılar və bu da öz bəhrəsini verdi. Rəqib komandanı da təbrik edirəm. Yaxşı oynadılar, ancaq bu gün (dünən – red.) qələbə bizə daha yaxın idi. Uşaqlarımız daha  istəkli idilər, ona görə də qələbə qazanmağı bacardıq. Artıq  final görüşünə  hazırlaşacağıq. Məşqlərdə planlarımızı müzakirə edəcəyik və finalda maksimum mübarizə aparıb kubokun sahibi olmağa çalışacağıq".

Evren Akkaya (“Sərhədçi”nin baş məşqçisi): "Matça çox yaxşı hazırlaşmışdıq. Amma uzaq atışlarda yaxşı oynamadıq və bu səbəbdən oyunun ritmini əlimizdə tuta bilmədik. İlk hissəni rəqib bizdən 10 xallıq üstünlüklə tamamladı. Normalda uduzduğumuz matçlarda olduğu kimi, yenə çox top itkilərinə yol verdik. Bunu aradan qaldırmağımız lazımdır. Kubokun finalından buna görə kənarda qaldıq. Əslində, müdafiədə istədiyimizi edə bilirik, amma hücumda lazım olan kimi oynamadıq. Yerli oyunçular meydanda olmalıdır, limit var. Azərin erkən faul etməsi planlarımızı pozdu. Məcburi şeylər etdik. Nəticə olaraq, “Neftçi” ilə matçda basketbol bəxti üzümüzə gülmədi. Finalda oynayacaq “Neftçi” və “Xəzri”yə uğurlar arzu edirəm”.