Honkonqda təşkil olunan Təsnifat Turnirinin qalibi olaraq "Paris-2024" Yay Olimpiya Oyunlarına lisenziya qazanan Azərbaycanın qadınlardan ibarət 3x3 basketbol millisi Vətənə dönüb.

Prosport.Az xəbər verir ki, yığmanı Heydər Əliyev Beynəlxalq Aeroportunda idman ictimaiyyətinin nümayəndələri, azarkeşlər, media mənsubları və idmançıların yaxınları qarşılayıb.

Qeyd edək ki, Azərbaycan millisi Olimpiya Təsnifat Turnirinin B qrupunda Çili və Monqolustanı məğlub edib. Komanda qrupdakı son oyunda Niderlanda uduzsa da, yarımfinala 2-ci kimi vəsiqə qazanıb. Yığma 1/2 finalda Macarıstana, finalda isə Polşaya qalib gələrək Paris Olimpiadasında iştirak hüququ əldə edib.

Bununla da ölkəmiz ilk dəfə Olimpiya Oyunlarında komanda idman növündə təmsil olunacaq.